Nafta zgjeron fitimet – Çmimet gjenden pranë nivelit më të lartë për 2019

Çmimet e naftës po qendrojnë në rritje edhe në sesionin e sotëm, ndërsa nafta Brent e Londrës është ngjitur mbi 69 dollarë për fuçi, që është niveli më i lartë për këtë vit. Çmimet vijojnë të mbështeten nga ulja e mëtejshme e eksporteve nga Venezuela. Por në anën tjetër, në treg ekzistojnë edhe shqetësimet që kanë të bëjnë me ngadalësimin e kërkesës. Shtetet e Bashkuara të Amerikës po konsiderojnë më shumë sanksione ndaj Iranit, në një kohë që eksportet e këtij vendi janë përgjysmuar që kur hynë në fuqi sanksionet fillestare.

Nafta Brent e Londrës po tregtohet në rreth 69.1 dollarë për fuçi, ndërsa më herët gjatë sesionit u rrit deri në 69.5 dollarë, niveli më i lartë që nga nëntori i vitit të kaluar. Nafta Bruto amerikane po tregtohet në rreth 61.7 dollarë për fuçi. Gjithashtu, edhe furnizimi i tregut nga Organizata e Vendeve Eksportuese të Naftës preku nivelin më të ulët në katër vitet e fundit, gjatë marsit, pasi Arabia Saudite, që është eksportuesi kryesor i kartelit, uli eksportet më shumë se marrëveshja e nënshkruar në dhjetor të vitit të kaluar.

Ndërkohë, analistët mendojnë se, rezervat e naftës në SHBA do të kenë rënë gjatë javës së kaluar, në shenjë se marrëveshja e OPEC po jep efekte. Analistët e anketuar nga Reuters parashikojnë një rënie të rezervave me 1.2 milionë fuçi, gjatë javës që u mbyll më 29 mars. Çmimet gjetën një mbështetje edhe nga të dhënat e publikuara në SHBA dhe Kinë. Shifrat treguan një rimëkëmbje të aktivitetit të fabrikave në SHBA, gjatë marsit, dhe një rritje të sektorit të manifakturës në Kinë, që kanë larguar përkohësisht shqetësimet për ngadalësimin e ekonomisë globale.

Lidion Kulla/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.