Nafta zgjeron fitimet – Çmimet vijojnë të mbështeten nga bisedimet SHBA-Kinë
Çmimet e naftës kanë vijuar tendencën në rritje edhe gjatë sesionit të sotëm, për shkak të shpresave se bisedimet që po zhvillohen në Pekin midis zyrtarëve amerikanë dhe atyre kinezë, mund të shmangin luftën tregtare mes dy ekonomive më të mëdha në botë. Gjithashtu, çmimet janë mbështetur edhe nga marrëveshja e OPEC dhe Rusisë për të ulur prodhimin, e cila nisi zbatimin në fillim të këtij muaji.
Nafta Brent e Londrës po tregtohet në rreth 58 dollarë për fuçi, ndërsa nafta Bruto amerikane po tregtohet në rreth 49 dollarë për fuçi. “Mendoj se ka mundësi të mira për të arritur një marrëveshje të arsyeshme me Kinën”, deklaroi Sekretari amerikan i Tregtisë, Ëilbur Ross. Megjithatë, disa analistë kanë paralajëmruar se marrëdhëniet midis Uashingtonit dhe Pekinit mbeten të paqëndrueshme dhe shumë shpejt tensionet mund të shpërthejnë përsëri.
Në anën tjetër, çmimet po gjenden nën presion për shkak të ngadalësimit të ekonomisë globale, që mund të dëmtojë kërkesën për naftë. Agjencia S&P e uli parashikimin për çmimin e naftës Brent për këtë vit në 55 dollarë për fuçi dhe 50 dollarë për naftën Bruto amerikane. Gjithashtu, një shqetësim konstant për tregun është rritja e prodhimit të naftës argjilore në SHBA. Referuar të dhënave zyrtare prodhimi në Amerikë u rrit me 2 milionë fuçi në ditë, gjatë vitit të kaluar, në një rekord prej 11.7 milionë fuçi në ditë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.