Nafta zgjeron fitimet – Ndikon rënia e rezervave në SHBA
Çmimet e naftës janë rritur në sesionin e sotëm, për shkak të rënies surprizë të rezervave në SHBA dhe për shkak të rreziqeve mbi furnizimin e tregut. Nafta Brent e Londrës po tregtohet në rreth 71.9 dollarë për fuçi, ndërsa nafta Bruto amerikane po tregtohet në rreth 66.8 dollarë për fuçi.
Në Shtetet e Bashkuara të Amerikës, rezervat e naftës ranë me 1 milionë fuçi, në totalin e 428 milionë fuçive, referuar të dhënave të Institutit Amerikan të Naftës. Megjithatë, investitorët po presin të dhënat zyrtare, që do të publikohen nga Administrata për Informimin mbi Energjinë.
Jashtë Shteteve të Bashkuara, tregu i naftës po gjen një mbështetje nga rreziku për furnizimin e tregut, duke përfshirë edhe zgjerimin e konfliktit në Lindjen e Mesme, rikthimin e sanksioneve ndaj Iranit dhe rënien e prodhimit në Venezuelë.
Përveç uljes vullnetare të prodhimit nga Organizata e Vendeve Eksportuese të Naftës, analistët shprehen se, edhe trazirat politike në Venezuelë po mbështesin çmimet.
Banka holandeze, ING, deklaroi në një shënim për klientët e saj se, arsyeja kryesore që ka rritur naftën Brent mbi 70 dollarë për fuçi, është rreziku gjeopolitik.
Gjithashtu, banka e rriti parashikimin për çmimin mesatar të naftës Brent për këtë vit në 66.5 dollarë, nga 60.25 dollarë që ishte vlerësimi i mëparshëm.
Ndërsa për naftën Bruto amerikane, ING parashikon një çmim mesatar prej 62.5 dollarë, nga 57.75 dollarë që ishte vlerësimi i mëparshëm. Gjithsesi, për vitin 2019, ING parashikon çmime më të ulëta, për shkak të rritjes së prodhimit në SHBA.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.