Nafta zgjeron fitimet – Shtyrja e uljes së prodhimit eklipson të dhënat në SHBA
Çmimet e naftës po qëndrojnë në rritje në sesionin e fundit të kësaj jave, pasi rritja e rezervave të naftës dhe prodhimit në SHBA është eklipsuar nga angazhimi i OPEC për të shtrirë edhe në vitin 2019, marrëveshjen për uljen e prodhimit.
Përkohësisht, nafta Brent e Londrës preku edhe nivelin më të lartë për këtë vit, prej 71 dollarë për fuçi, por në vijim ra sërish poshtë 70 dollarëve.
Nafta Bruto amerikane po tregtohet në rreth 64.9 dollarë për fuçi, ndërsa nafta Brent e Londrës preku nivelin e 69.3 dollarëve për fuçi. që nga fillimi i janarit, nafta Brent është rritur ne rreth 5% dhe pritet të publikojë fitime për të tretin tremujor me radhë.
Nafta Bruto amerikane është rritur me rreth 7.5%, gjatë këtij tremujori. Analistët mendojnë se, vendosmëria e OPEC dhe Rusisë për të shtyrë marrëveshjen për uljen e prodhimit edhe në vitin 2019, është arsyeja kryesore që po mbështet çmimet.
Palët do të takohen në qershor, për të vendosur për politikat e ardhshme të naftës. Në anën tjetër, kompanitë amerikane të energjisë e ulën aktivitetin e shpim-kërkimit për herë të parë në tre javë.
Referuar të dhënave, numri i puseve aktive ra me 6 njësi, gjatë kësaj jave, në totalin e 798 puseve.
Ndërkohë, nafta bruto e Shanghait, që debutoi të hënën ka rënë me rreth 7%, gjatë kësaj jave. Në mbyllje të sesionit, nafta e Shanghait u rrit lehtë në 409.7 juan ose 65.18 dollarë për fuçi.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.