Nafta zgjeron humbjet – Çmimet bien me 10 dollarë gjatë tetorit
Çmimet e naftës po qëndrojnë në rënie edhe në sesionin e sotëm, duke publikuar humbje për të tretin sesion me radhë, pasi Arabia Saudite paralajmëroi për mbifurnizimin e tregut.
Gjithashtu, edhe shitja masive e aksioneve, që u rikthye në ditën e sotme, dhe shqetësimet që kanë të bëjnë me luftën tregtare kanë mbështetur rënien e naftës.
Nafta Brent e Londrës po tregtohet në rreth 76.1 dollarë për fuçi, ndërsa nafta Bruto amerikane po tregtohet në rreth 66.6 dollarë për fuçi. Analistët mendojnë se, rënia e çmimeve me rreth 10 dollarë që nga fillimi i tetorit është mbështetur sidomos nga shitja e aksioneve në tregjet e kapitalit.
Këtë javë Wall Street realizoi humbjet më të mëdha ditore që nga viti 2011. Tregjet financiare po goditen nga disa shqetësime, si lufta tregtare SHBA-Kinë, rënia e monedhave të vendeve në zhvillim, rritja e kostos së huamarrjes dhe shqetësimet që kanë të bëjnë me buxhetin e Italisë.
Gjithashtu, ka pasur shenja për ngadalësimin e tregtisë globale, pasi numri i kontejnerëve dhe qarkullimi i mallrave është ngadalësuar.
Rënia e çmimeve të naftës vjen pavarësisht se në datën 4 nëntor do të hyjnë në fuqi sanksionet amerikane ndaj Iranit. Uashingtoni ka deklaruar se do të zerojë eksportet e naftës nga ky vend.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.