Nafta zgjeron humbjet – Pritet të publikojë fitime për të tretën javë me radhë
Çmimet e naftës po qendrojnë në rënie në sesionin e sotëm, por megjithatë pritet të publikojnë fitime për të tretën javë me radhë. Edhe gjatë këtij muaji, çmimet vijojnë të mbështeten nga marrëveshja e OPEC dhe Rusisë për të ulur prodhimin dhe nga sanksionet e Uashingtonit ndaj Iranit dhe Venezuelës. Nafta Brent e Londrës po tregtohet në rreth 67.3 dollarë për fuçi, ndërsa nafta Bruto amerikane po tregtohet në rreth 59.5 dollarë për fuçi.
Investitorët janë në pritje edhe të zhvillimeve që kanë të bëjnë me marrëveshjen tregtare mes Shteteve të Bashkuara të Amerikës dhe Kinës. Takimi i radhës mes dy administratave do të zhvillohet më 28 dhe 29 mars. Sipas një sondazhi të Reuters, 3 në 4 kompani japoneze parashikojnë se, konflikti tregtar mes dy ekonomive më të mëdha në botë, do të zgjasë të paktën deri në fund të këtij viti. Në anën tjetër, ngadalësimi i rritjes ekonomike në Azi, Europë dhe Amerikën e Veriut, pritet të dëmtojë konsumin.
Ndërkohë, rritja e prodhimit në SHBA me rreth 2 milionë fuçi në ditë, gjatë vitit të kaluar, në një rekord prej 12.1 milionë fuçi e ka bërë Amerikën prodhuesin më të madh në botë, duke lënë pas Rusinë dhe Arabinë Saudite. Kjo rritje e prodhimit ka rezultuar edhe në rritjen e eksporteve në më shumë se 3 milionë fuçi në ditë. Agjencia Ndërkombëtare e Energjisë parashikon se, SHBA do të bëhet një eksportues neto i naftës deri në vitin 2021, që do të thotë se do të eksportojnë më shumë sesa do të importojë.
Lidion Kulla/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.