NATO dhe BE, aleancë kundër Kinës / Krijohet grupi që do t’i përgjigjet kërcënimit kibernetik të Pekinit zyrtar
Një aleancë e re është krijuar mes vendeve anëtare të NATO-s, Bashkimit Europian, Australisë, Zelandës së Re dhe Japonisë, në përgjigje të kërcënimit global që vjen nga sulmet kibernetike të mbështetura nga qeveria kineze. “Grupi do të ndajë informacione mbi kërcënimet kibernetike dhe do të bashkëpunojë për mbrojtjen e rrjetit dhe mbi sigurinë”, njoftoi një zyrtar i lartë i administratës së presidentit amerikan, Joe Biden. Në një veprim të përbashkët të hënën, grupi fajësoi Ministrinë kineze për Sigurinë Shtetërore për sulmet masive kibernetike në serverat e emaile-ve të Microsoft, më herët gjatë këtij viti. Sulmi u krye nga hakerat që financohen nga Ministria kineze e Sigurisë Shtetërore, që gjithashtu kanë ndërmarrë sulme të tjera mbi kompani apo instuticione. Gjithashtu të hënën, FBI, Agjencia për Sigurinë Kombëtare dhe Agjencia për Sigurinë Kibernetike dhe të Infrastrukturës publikuan një listë këshilluese me 50 taktika, teknika dhe procedura që përdorin hakerat e sponsorizuar nga qeveria kineze. Sulmi ndaj serverave të Microsoft u bë publik në mars dhe besohet se janë goditur të paktën 30 mijë organizata amerikane dhe qindra mijëra të tjera në të gjithë botën. Microsoft e identifikoi grupin e hakerave, si një grup të panjohur spiunazhi kinez, i quajtur Hafnium. Deklarata e përbashkët bazohet në përpjekjet e presidentit Joe Biden, për të bërë bashkë aleatët e NATO-s dhe të BE-së për një qasje më konfrontuese përballë Kinës.
Lidion Kulla – SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.