NATO do të ndërtojë bazë ajrore në Shqipëri – Rama: Mbi 50 milionë euro investim
Në Shqipëri do të ndërtohet baza e parë ajrore në Ballkanin Perëndimor. Lajmi është bërë i ditur nga vetë kryeministri Rama nëpërmjet një postimi, pas vendimmarrjes nga ana e Këshillit të Atlantikut të Veriut.
Baza ajrore e Kuçovës do t’i nënshtrohet punimeve për modernizimin e saj dhe vetëm në fazën e parë pritet të investohen mbi 50 milionë euro. Fondet për këtë projekt do financohen nga NATO dhe një pjesë nga qeveria e Shqipërisë.
“Kuçova do të shërbeje njëkohësisht edhe si bazë kombëtare për Forcën Ajrore Shqiptare dhe ky Investim strategjik i NATO-s në Shqipëri, do të sjellë një standard të ri për Forcat tona të Armatosura. Padyshim, një investim i këtyre përmasave krijon mundësi të reja për zhvillimin ekonomik e social të gjithë rajonit ku planifikohet ndërtimi i kësaj baze të re ajrore të teknologjisë së fundit”, shprehet Rama.
Puna për këtë projekt pritet të nisë brenda vitit, ndërsa Kuçova do të shërbejë si bazë mbështetëse për NATO-n për furnizim ajror; mbështetje logjistike; mbështetje për policimin ajror; si dhe trajnime dhe stërvitje të Aleancës.
Rama zbuloi gjithashtu se qeveria po zhvillon diskutime me Shtetet e Bashkuara për modernizimin e mëtejshëm të kapaciteteve ajrore shqiptare. Vendimmarrja mbi këto diskutime do të vendoset nga Kongresi amerikan.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.