NATO kërcënon Moskën me sanksione nëse trupat ruse pushtojnë Ukrainën!

Sekretari amerikan i Shtetit Antony Blinken kërcënoi Moskën me sanksione të rënda ekonomike nëse presidenti Vladimir Putin sulmon Ukrainën, duke këmbëngulur se “diplomacia është mënyra e vetme përgjegjëse për të zgjidhur këtë krizë të mundshme”.

Tensionet rreth grumbullimit të trupave ruse përgjatë kufirit të Ukrainës, qeveria e së cilës po kërkon të rreshtohet me NATO-n dhe Perëndimin, kanë qenë në qendër të udhëtimit njëjavor të Blinken në Europë dhe ishin në krye të axhendës në takimin e tij me homologët e NATO-s në Letoni.

Blinken shtoi se SHBA-ja ja ka bërë të qartë Kremlinit që do të përgjigjet me vendosmëri, duke përfshirë një sërë masash ekonomike me ndikim të lartë që nuk i ka përdorur në të kaluarën.

Ai nuk pranoi të japë detaje rreth sanksioneve, por vazhdoi duke thënë se “NATO është e përgatitur të përforcojë mbrojtjen e saj në krahun lindor”, pa dhënë detaje.

Organizata ushtarake tashmë ka forca të stacionuara në Estoni, Letoni, Lituani dhe Poloni.

Blinken tha gjithashtu se do t’i kërkonte ministrit të Jashtëm Sergei Lavrov t’i kthehej bisedimeve nën formatin “Normandi”, me SHBA, Francën dhe Gjermaninë, kur të takohet me krye-diplomatin rus në Suedi të enjten.

Ndërsa ndodhet në Stokholm, në një takim në nivel ministror të Organizatës për Siguri dhe Bashkëpunim në Europë, Blinken do të zhvillojë gjithashtu bisedime me ministrin e Jashtëm ukrainas Dmytro Kuleba.

Edel Strazimiri / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.