Ndalimi i luftës tregtare – Kina do të zhvillojë bisedime me SHBA në fund të Gushtit
Kina deklaroi këtë javë se do të zhvillojë bisedime të reja mbi tregtinë me SHBA në fund të muajit Gusht, duke ofruar pak shpresë për progres në zgjidhjen e konfliktit. Delegacioni kinez i drejtuar nga zv/ministri i Tregtisë, Wang Showen, do të takohet me përfaqësues të SHBA, me në krye Sekretarin e Thesarit për Çështjet Ndërkombëtare, David Malpass.
Dy ekonomitë më të mëdha në botë kanë vendosur tarifa në importe për mallrat e secilit që prej nisjes së vitit dhe kanë kërcënuar barriera ndaj qindra miliardë dollarë eksporte. Lajmërimi për takimin vjen pas ngecjes së bisedimeve mes dy palëve. Megjithatë, nuk dihet ende nëse do të zhvillohet përpara apo pas datës 23 Gusht, kur Washingtoni planifikon të tarifojë 16 miliardë dollarë mallra të tjerë kinezë.
Raundi i fundit i bisedimeve ndodhi në Qershor, kur Sekretari i Tregtisë në SHBA Wilbur Ross, takoi zv/Kryeministrin kinez, Liu He në Pekin. Ndërkohë që është bërë pak progres nga takimi i fundit, Shtëpia e Bardhë deklaroi më datë 3 Gusht se vendi qëndron i hapur për bisedime me Kinën, për zgjidhjen e konfliktit tregtar.
Kina ka bërë vazhdimisht të ditur se kompanitë dhe konsumatorët amerikan do të pësojnë goditje të madhe nga lufta tregtare. Sipas një shkrimi nga gazeta e partisë komuniste në Kinë, People’s Daily, slogani “Amerika e Para” i Donald Trump ka shkaktuar vetëm trazira ekonomike për vendin, duke vënë në dukje shembuj si humbjet e fermerëve të sojës në SHBA prej luftës tregtare.
Lajmërimi për zhvillimin e bisedimeve të reja mbështeti bursat kineze, ndërkohë që indekset e titujve të kapitalit në Shangai dhe Hong Kong, frenuan rënien.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.