Ndalohet peshkimi në Karaburun-Sazan – Rregullat dhe oraret e reja për peshkatarët
Ministria e Bujqësisë ka ndaluar çdolloj aktiviteti peshkimi në zonën e mbrojtur “Parku Kombëtar Detar Karaburun–Sazan”. Rregullorja e cila është botuar në Fletoren Zyrtare dhe ka hyrë në fuqi, nuk do ta lejojë më këtë aktivitet në gadishullin e Karaburunit dhe ishullin e Sazanit. Ndërkaq, është vendosur që aktiviteti i peshkimit çlodhës-argëtues të kryhet në një distancë jo më të vogël se 500 m nga mjetet e peshkimit profesional.
Rregullorja përcakton se ushtrimi i aktivitetit të peshkimit çlodhësargëtues ndalohet të kryhet gjatë sezonit turistik në orarin 8:30 me 19:30, në një distancë jo më të vogël se 200 m nga plazhet dhe 100 m nga brigjet shkëmbore. Përjashtimisht, ky aktivitet kryhet në mole dhe shkëmbinj edhe gjatë sezonit turistik në oraret e ndalimit, me kallama dhe grepa dore vetëm në mungesë të pushuesve. Me ardhjen e pushuesve aktiviteti ndërpritet menjëherë. Aktiviteti i peshkimit sportiv nuk zhvillohet me mjete të peshkimit profesional.
Ndryshime ka edhe sa i takon peshkimit nënujor amator, ku ndalohen të përdoren bombola oksigjeni gjatë zhytjes; ndalohet zënia e koraleve, molusqeve; ndalohet kalimi në zonat e frekuentuara nga turistët me pushkën e karikuar; ndalohet të ushtrohet aktiviteti në një distancë më të vogël se 500 m nga plazhet e frekuentuara nga pushuesit; ndalohet të ushtrohet aktiviteti në një distancë më të vogël se 100 m në plazhet shkëmbore.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.