‘Ndarja e OSHEE, kompanitë s’kanë pavarësi’ – Debatet/ Bushati: Kontrollohen nga 1 administrator i vetëm. Bejtja: E lejon Traktati i Energjisë
Struktura aktuale e Operatorit të Shpërndarjes së Energjisë Elektrike nuk garanton pavarësinë e 3 kompanive të krijuara, për shkak të kompanisë mëmë, që drejtohet nga i njëjti administrator”. Shqetësimi është ngritur nga deputetët e opozitës, gjatë diskutimeve në Komisionin parlamentar të Veprimtarive Prodhuese për një kredi prej 50 mln euro nga Agjencia Franceze për Zhvillim për sektorin elektorenergjetik.
Përgjigjen e dha zv.ministri i Infrastrukturës dhe Energjisë, Ilir Bejtja, i cili tha se pronësia vertikale është e pranueshme nga Traktati i Komunitetit të Energjisë.
Nga ndarja e OSHEE u krijuan 3 kompani e më konkretisht: Furnizuesi i Tregut të Lirë, Furnizuesi i Shërbimit Universal dhe Operatori i Sistemit të Shpërndarjes. Këto 3 kompani, përbëjnë OSHEE Group, që drejtohet nga 1 administrator I përbashkët. Ndërkaq, Kredia prej 50 mln euro nga Agjencia Franceze për Zhvillim, do të shkojë për konsolidimin e ndarjes së Operatorit të Shpërndarjes së Energjisë Elektrike.
Gjithashtu, ajo do të shpenzohet për funksionimin e Bursës së Energjisë dhe hapjen graduale të tregut të shitjes me pakicë, së bashku me krijimin e një tregu konkurrues të energjisë. Por, sipas deputetëve të opozitës të gjithë këto procese duhej të ishin përmbyllur që në vitin 2018.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.