Ndarja e OSHEE në 3 kompani/ Hapet tenderi për punonjësit dhe pagat

Në kuadër të ndarjes në tre kompani, Operatori i Shpërndarjes së Energjisë Elektrike ka hapur tenderin për përshtatjen e sistemit të punësimit dhe pagesës së punonjësve. Referuar dokumenteve të tenderit, sistemi i HR & Payroll përdoret nga Departamenti i Burimeve Njerëzore prej vitit 2015.

“Në kuadër të ndarjes së OSHEE sh. a dhe krijimit të tre kompanive të reja duhet që në vazhdimësi të përshtatet procesi i organizimit të kompanive të reja dhe përgatitja e tyre për të filluar operimin.

Për këtë arsye nevojitet që sistemi i HR & Payroll të përgatitet me modifikimet e nevojshme. Përveç ndryshimeve që janë të domosdoshme nga sa më sipër, programi i burimeve njerëzore ka nevojë për suport profesional nga kompani të specializuara per mirembajtjen e sistemit dhe përditësimet e legjislacionit që lidhen me llogaritjen e pagave.

Për të përmisuar dhe rritur transparencën e marrëdhënies së kompanisë dhe burimeve njerëzore duhet të ofrohen mundësitë brenda këtij sistemi me anë të ndërfaqeve e moduleve të reja” shkruhet në dokumentet e tenderit.

Qëllimi i këtij projekti është që të shtohen edhe 3 sisteme të reja HR & Payroll, përmirësimi i vazhduar dhe integrimi i proceseve te reja të punës lidhur me administrimin e burimeve njerezore dhe llogaritjes se pagave në sistemin egzistues për të rritur efektivitetin e të gjithë përdoruesve nëpërmjet automatizimit.

OSHEE është parashikuar të ndahet duke krijuar tre kompani, përkatësisht Furnizuesin e Shërbimit Universal sh.a, Furnizuesi i Tregut Të Lirë sh.a dhe Operatori i Sistemit të Shpërndarjes sh.a.

Tenderi ka fond limit 5 milionë e 893 mijë lekë dhe afati për aplikimet është deri me 28 shkurt 2020.

SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.