Ndërhyn opozita në Britani – Premton të mposhtë Johnson me një mocion të mosbesimit

Partia e opozitës në Britani nisi përpjekjen për të mposhtur Kryeministrin Boris Johnson me një mocion të mosbesimit, duke i bërë thirrje deputetëve që t’i bashkohen një qeverie të përkohshme të drejtuar nga Jeremy Corbyn, dhe të parandalohet Brexit pa marrëveshje. Johnson ka premtuar daljen e Britanisë më datë 31 Tetor, qoftë edhe pa marrëveshje tregtare, gjë që ka nisur grindjet në parlament, ndërkohë që shumë deputetë kërkojnë periudhë të tranzicionit.

Në një letër drejtuar liderëve të opozitës dhe  disa konservatorëve të lartë që kundërshtojnë daljen pa marrëveshje, Corbyn tha se “Qeveria e përkohshme do të vonojë Brexit dhe sjellë zgjedhje të përgjithshme”.   Corbyn tha se partia Laburiste do të bëjë fushatë në zgjedhje për të mbajtur një referendum të dytë për kushtet e Brexit, përfshirë mundësinë e qëndrimit në Europë.

“Kjo Qeveri nuk ka mandat për daljen pa marrëveshje dhe referendumi i 2016-ës nuk ofroi mandat për këtë skenar”, tha Corbyn duke justifikuar mocionin e mosbesimit.   Parlamenti kthehet nga pushimet e Verës më 3 Shtator, ku do të rinisë beteja për Brexit, që do të përcaktojë fatin e ekonomisë së pestë më të madhe në Botë.

Klevis Llaha / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.