Ndërhyrje në rrjetin e transmetimit – Kredia e rimëkëmbjes së sektorit energjetik/ OST, investime në 12 nënstacione
Operatori i Sistemit të Transmetimit po planifikon të instalojë sistemin SCADA në nënstacionet e tensionit 110 kw, i cili mundëson monitorimin online të sistemit . Investimi do të realizohet me fondet e kredisë së Bankës Ndërkombëtare për Rindërtim dhe Zhvillim për projektin e rimëkëmbjes së sektorit të energjisë elektrike.
Për këtë qëllim, OST ka hapur një procedurë prokurimi, që ka si objekt projektimin, prodhimin, testimin, shpërndarjen, shërbimet e instalimit, kompletimin dhe komisionimin e pajisjeve të telekomunikacionit. Pjesë e projektit do të jenë 12 nënstacione, duke përfshirë atë të Tiranës Qendër, Beratin, Vlorën, Krujën apo Golemin. Ndërkaq, kompanitë që do të dorëzojnë ofertat e tyre do të duhet t’i shoqërojnë me sigurimin e ofertës, në masën e 45 mijë eurove.
Ndërkaq, pas përfundimit të procedurave tenderuese, punimet pritet të zgjatin 18 muaj nga nënshkrimi i kontratës. Vitin e kaluar edhe Operatori i Shpërndarjes së Energjisë Elektrike, vuri në funksion sistemin e ri SCADA, me anë të së cilës Dispeceria Qendrore e Tensionit të Lartë e kompanisë monitoron online rrjetin elektrik të shpërndarjes së energjisë elektrike, duke rritur cilësinë e e furnizimit për klientët fundorë.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.