Ndërlidhja me rrjet gazi – Pas linjës 400 KV, Shqipëria dhe Maqedonia me projekt të përbashkët për gazin
Në pritje të fillimit të punimeve për ndërtimin e linjës së interkonjeksionit 400 kV Elbasan-Manastir, Shqipëria dhe Maqedonia ndërmarrin hapat e para edhe për lidhjen e tyre me rrjet gazi. Ministri i Infrastrukturës dhe Energjisë, Damian Gjiknuri ka pritur në një takim zyrtar Ministrin e Ekonomisë së Maqedonisë, ndërsa është nënshkruar edhe një memorandum mirëkuptimi mes vendeve.
“Jam i bindur se lidhja me gazsjellës mes Shqipërisë dhe Maqedonisë do të jetë me shumë rëndësi për të dyja vendet. Do të jetë një projekt shumë fizibël sepse janë shumë afër, pra pika e daljes afër Bilishtit apo Korçës do të jetë shumë afër me kufirin e Maqedonisë, çka bën që projekti të ketë një kosto më të ulët por dhe përfitimet të jenë të mëdha”.
Në vlerësimin e ministrit Bekteshi, Shqipëria dhe Maqedonia janë pjesë e Komunitetit të Energjisë nga ku rrjedhin edhe shumë obligime të cilat përmbushen vetëm përmes hapave konkrete.
“Jemi më shumë se të interesuar që të thellojmë bashkëpunimin dhe dua tu dëshiroj të dyja kompanive respektive që sa më shpejt, grupet e punës të fillojnë të punojnë në mënyrë teknike që në një afat sa më të shkurtër këtë projekt ta kemi realitet midis dy vendeve”.
Memorandumi i firmosur mes kompanisë shtetërore të gazit Albgaz dhe Agjencisë së Burimeve Energjetike të Maqedonisë, parashikon themelimin e një grupi pune të përbashkët të gazit; vlerësimin dhe hartimin e projekt idesë për linjën e interkonjeksionit ndërmjet dy vendeve si dhe përcaktimin e parametrave teknikë dhe përgatitjen e një dokumenti final ku të bëhet prezantimi i korridorit si një i vetëm. Ndërkaq, Gjiknuri bëri me dije se dy vendet tanimë e kanë drejt fazave finale procesin e tenderimit për ndërtimin e linjës së interkonjeksionit 400 kV, për ndërtimin e së cilës shteti shqiptar do të marrë 50 mln euro kredi.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.