Ndërpriten fluturimet, Aeroporti i Rinasit më i prekuri në rajon nga dëbora
Aeroporti Ndërkombëtar i Tiranës “Nënë Tereza” është ndër më të prekurit nga moti i keq dhe reshjet e dëborës. Për shkak të reshjeve të rëna gjatë mbrëmjes të së Mërkurës, për disa orë fluturimet në aeroportin e vetëm të Shqipërisë, janë ndërprerë.
Në faqen zyrtare në rrjet të aeroportit, vihet re se anulimi i parë ka qenë rreth orës 1:35 të mesnatës nga Beogradi dhe më pas ka pasur vonesa të linjave me Turqinë dhe Italinë.
Ndërsa fluturimet e parashikuara nga ora 10:55 deri në 11:10 të paradites së Enjte, në destinacione si Bolonjë, Venecia dhe Milano janë anuluar, ndërsa temperatura regjistrohet në 0 gradë C.
I kontaktuar nga TV SCAN, drejtori i Autoritetit të Aviacionit Civil, Flamur Çelaj, bëri me dije se për arsye sigurie dhe për shkak të ngricave është dhënë urdhër për ndërprerjen për rreth 3 orë të fluturimeve deri në pastrimin e plotë të pistës.
Sipas tij, vendimi është marrë në koordinim me aeroportet ndërkombëtare që kanë pothuajse të njëjtat kushte atmosferike. Por, TV SCAN ka vëzhguar nisjet dhe mbërritjet online nga aeroportet e Shkupit, Podgoricës dhe Prishtinës, ku vihet re se fluturimet në këto aeroporte kanë qenë thuajse brenda normalitetit, me disa vonesa të vogla.
Konkretisht në aeroportin e Shkupit, paraqitet vetëm një fluturim me vonesë me Dubain, megjithëse temperatura shënon -16 grade C.
Po ashtu edhe në aeroportin e Podgoricës vihet re vetëm një vonesë e linjës me Beogradin, ndërsa temperatura shënon -3 gradë. Ndërsa nga aeroporti i Prishtinës, nuk paraqiten vonesa dhe anulime të fluturimeve.
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.