Ndërpriten pritjet fizike në zyrat e pensioneve – Nga 1 Maji, aplikimet për 56 shërbime të ISSH-së, vetëm online!
Nga data 1 Maj dhe në vijim, aplikimet për 56 shërbime në total, që ofrohen nga Instituti i sigurimeve Shoqërore do të kryhen vetëm online. Ky institucion ka njoftuar të gjithë individët e interesuar se nga kjo datë, Drejtoritë Rajonale të Sigurimeve, Degët e Sigurimeve Shoqërore dhe Agjencitë Lokale të Sigurimeve Shoqërore ne të gjithë vendin do të funksionojnë vetëm përmes internetit duke shmangur çdo lloj kontakti fizik midis punonjësve dhe qytetarëve.
Kështu, ISSH bën me dije se të gjitha aplikimet e të interesuarve do të behën përmes platformës e-albania dhe në rastet kur aplikimet kanë dokumente shoqëruese, ato do të dërgohen nëpërmjet Postës Shqiptare pranë Drejtorive Rajonale të Sigurimeve Shoqërore, në të cilat është bërë aplikimi. Sipas Institutit të Sigurimeve Shoqërore kjo reformë ka në fokus qytetarin dhe synon marrjen e shërbimeve në çdo kohë, nga kudo ku ndodhen dhe pa kosto.
Konkretisht, ndër aplikimet më të rëndësishme janë ato për pension pleqërie, invaliditeti, pension familjar, të cilat tashmë do të jenë on line, aplikime për lejen e barrëlindjes, për paaftësi nga sëmundjet, nga aksidentet, aplikime për të ardhura shtesë përkujdesje; të ardhura shtesë për fëmijën në ngarkim; etj. Po ashtu, do të aplikojnë on line edhe ato familje që përfitojnë kompensim të energjisë elektrike dhe ata individë që përfitojnë trajtime të veçanta.
Ndërkohë që edhe dorëzimi i listëpagesave të kontributeve shoqërore nga bizneset dhe individët do të kryhet në rrugë elektronike. Se sa e zbatueshme do të jetë kjo reformë në kushtet e Shqipërisë, ku njohuritë elektronike janë të kufizuara sidomos në shtresat vulnerabël dhe moshën e pensionit, kjo mbetet për t’u parë.
Elisabeta Dosku / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.