Ndërtimi i HEC-eve në Osum – Malltezi: Rama ka qenë në dijeni, jep leje shkatërruese për mjedisin

Pak ditë nga anulimi  i ndërtimit të Hec-it në Osum ka reaguar kreu i departamentit të mjedisit në Partinë Demokratike Jamarbër Malltezi. Sipas Malltezit Edi Rama ka qënë në dijeni  të projektit që dëmtonte kanionet e Osumit, por ka vazhduar me miratimin e tij në dhjetor 2017, duke dëmtuar  mjedisin dhe turizmin  ne vend .

“Edi Rama dhe Blendi Klosi nxituan të mbyllin me një deklaratë ndjese çështjen e ndërtimit të hidrocentraleve tek Kanionet e Osumit. Por të dy luajnë teatër me Shqiptarët. Letra e publikuar në media e ish Kryetarit të Kuvendit Ilir Meta, zbulon se Rama ka qenë në dijeni të projektit që dëmtonte kanionet e Osumit, por ka vazhduar me miratimin e tij në dhjetor 2017, kur tepsine e kishte të gjithën për vete.Rama dhe Klosi luajnë teatër edhe me premtimet për ndjekje penale, sepse ata kanë graduar me detyra më të larta, personat që kanë firmat në lejen mjedisore, pa të cilën nuk nis dot ndërtimi i asnjë projekti”, tha Malltezi.

Sipas kreut të departamentit të mjedisit në PD, Jamarbër Malltezi, një tjetër skandal po ndodh me  zonat e mbrojtura.

“Në fakt, me zonat e mbrojtura po ndodh një skandal tjetër i madh. Në krye të Agjensisë së Zonave të Mbrojtura është emëruar Zamir Dedej. Deri para pak vitesh, ai ishte drejtor i një shoqate mjedisore, e quajtur INCA. Sot, buxheti i Agjensisë për investime/monitorime/trainime, mbi 330 milionë leke, i janë kaluar shoqatës mjedisore”, shtoi ai.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.