Ndërtimi i këndeve të lojërave – Veliaj: Në Shqipëri, këndi i parë për fëmijët me aftësi ndryshe

Tirana është qyteti i parë në Shqipëri me një kënd lojërash ku fëmijët me aftësi ndryshe mund të luajnë dhe të argëtohen. Bashkia e Tiranës, me mbështetjen e UNDP-së dhe bizneseve lokale, përfundoi këndin e lojërave në Kombinat për të gjithë fëmijët e zonës, por për shkak të infrastrukturës speciale me të cilën është ndërtuar, do të jetë një vend argëtimi edhe për fëmijët me aftësi ndryshe.

Këndi i ri u përurua nga kryetari i Bashkisë së Tiranës, Erion Veliaj dhe përfaqësuesi i përhershëm i UNDP-së në Shqipëri, Brian Williams.

“Më vjen mirë që këndi ynë i 20 është edhe një park i veçantë, ku për herë të parë mund të luajnë fëmijët me aftësi ndryshe, duke qenë se këtu në Kombinat kemi një nga qendrat e trajtimit. Do të thotë që edhe ngjyrat që janë përdorur, edhe lodrat, edhe aksesi i këndit, është përshtatur për fëmijët me aftësi ndryshe, është bërë i tillë që të japim një mesazh: Në qytetin e Tiranës nuk lëmë askënd pas. Askush nuk duhet të ndihet i vetëm prej faktit se nuk akseson dot lodrat apo shërbimet, çerdhet, kopshtin, apo shkollën”, tha Veliaj.

Përfaqësuesi i Përhershëm i UNDP-së në Shqipëri, Brian Williams theksoi faktin se ky projekt është realizuar falë një bashkëpunimi ku janë përfshirë disa investitorë.

 “Ky është parku i parë i lojërave për fëmijë me aftësi ndryshe dhe nevoja të veçanta. Në Shqipëri ka 18 mijë fëmijë me aftësi të veçanta. Kombinati është vendi i parë, që pajiset me një kënd të tillë lojërash për këta fëmijë. Në fakt, ky kënd lojërash është bërë i mundur falë financimit të Bashkisë së Tiranës, por edhe financimet që vinë nga biznese private dhe vetë komuniteti. Kjo është një mënyrë e mirë bashkëpunimi dhe partneriteti që bëhet përmes komunitetit dhe fondeve të bashkisë”, u shpreh Williams.

Veliaj theksoi se puna me këndet e lojërave për fëmijë nuk do të ndalet me kaq, duke shtuar se synimi është ndërtimi i tyre në çdo lagje. Kështu pritet që Bashkia të ndërtojë edhe 20 kënde të tjera lojërash në të gjithë kryeqytetin duke e çuar në 40 numrin e tyre.

Entela Barjamaj/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.