Ndërtimi i rrugëve të bllokut pranë Astirit – Bashkia hap tenderin, projekti përfshin dhe prishjen e objekteve që zënë hapësirat
Bashkia e Tiranës ka hapur procedurat e tenderimit publik për ndërtimin e rrugëve të bllokut pranë ish-Astirit, duke vënë në dispozicion një fond limit prej më shumë se 57.7 milionë lekë për këtë investim.
Ky bllok ndodhet pranë rrugës ‘Teodor Keko’, i njohur si zona e ish-Astriti dhe kufizohet nga rrugë ‘Aleksandri I Madh’, ‘Tom Plezha’ dhe ‘Mikel Maruli.’ Bazuar në dokumentat e publikuara pranë Agjencisë së Prokurimit Publik, pjesë e projektit janë gjithashtu edhe rruga ‘Jata’ si dhe rruga paralel më të.
Gjendja aktuale e këtyre segmenteve rrugore paraqitet e amortizuar, ku nga inspektimet e kryera rezulton se ka dëmtime edhe në rrjetin e ujërave të zeza e të bardha. Nisur nga kjo, është parë e domosdoshme vendosja e rrjeteve të reja për disiplinimin e ujërave të zeza e të bardha.
Ndërkohë, grafiku i punimeve përfshin gjithashtu ndërtimin e një sipërfaqe të gjelbër, çka mungon në këtë zonë, si dhe vendosja e sinjalistikës rrugore vertikale e horizontale.
Ndërkohë, është projektuar gjithashtu krijimi i hapësirave për parkingje përgjatë rrugëve, aty ku gjerësia e tyre është e mjaftueshme për lejimin e tyre. Në disa segmente është parashikuar parkim paralel me karexhatën dhe në pjesë të tjera me kënd 45 gradë.
Ndërsa, do të bëhet edhe vendosja e sistemit të ndriçimit, pasi në këtë bllok mungon plotësisht ndriçimi publik. Investimi përfshin edhe ndërtimin e linjave rezervë për internet e telefon si dhe vendosja e koshave në çdo 3 shtylla ndriçimi, për shkak të mungesës së hapësirave të tjera.
Po ashtu, gjatë hartimit të projekt-zbatimit është parashikuar të prishen një sërë ndërtimesh (kryesisht lokale) që zënë hapësirat e bllokut. Të gjitha rrugët e këtij blloku banimi janë parashikuar me gjerësi 3.5 metra me një sens. Vetëm në një segment të caktuar ku ka parkim nën pallate rruga do të jetë me dy sense kalimi për të lejuar futjen dhe daljen e automjeteve nga parkimi.
Ndërsa sa i takon grafikut të punimeve, parashikon një kohështrirje prej 19 javë kalendarike.
Genta Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.