Ndërtimi i TEC-it në Korçë – Filo letër ministrave: Mos i lejoni investitorët, asnjë garanci për ndotjen

Kreu i bashkisë së Korçës, Sotiraq Filo kundërshton ndërtimin e TEC-it në  këtë qark  duke i kërkuar dy ministrave  asaj të Energjisë dhe Infrastrukturës, Belinda Balluku dhe atij të Turizmit dhe Mjedisit, Blendi Klosi të mos e aprovojnë vlerësimin e ndikimit në mjedis pasi investitorët nuk kanë paraqitur asnjë garanci për një bilanc pozitiv të ndotjes.

Në letrën drejtuar dy ministrave, kreu i bashkisë së Korçës  thekson se projekti është shumë afër qytetit dhe në toka të frytshme bujqësore. Sipas Filos, ky qëndrim është mbështetur edhe nga Ministria e Bujqësisë dhe Zhvillimit Rural e cila ka theksuar se projekti cenon funksionalitetin e Fushës së Korçës nga fshati Barc deri në Zemblak.

Kreu i bashkisë i këtij qyteti, Sotiraq Filo i kërkon  ministrive të mos e aprovojnë  duke shtuar se  investimi , në çdo rast nuk do të mund të realizohet dot në kundërshtim me vullnetin e Bashkisë së Korçës e cila e ka shprehur qëndrimin e saj kundër këtij investimi që në raportin e dhjetorit të vitit 2017.  Menjëherë ka reaguar përmes rrjetit social FB ministri Blendi Klosi i cili shprehet se nuk ka asnjë  autorizim e asnjë leje por një miratim në parim si investim strategjik.

Klosi shton se  për sa kohë  një projekt nuk ka standardet e BE  nuk ka shanse për të nisur punë dhe as për autorizim.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.