Ndërtohet këndi i 21 i lojërave – Ambasada Çeke mbështet Bashkinë e Tiranës duke investuar

Projekti i Bashkisë së Tiranës për të ndërtuar kënde lojërash dhe hapësira çlodhëse në çdo lagje të Tiranës ka gjetur përkrahjen edhe të përfaqësive diplomatike të akredituara në vendin tonë. Ambasada çeke është e para e cila iu bashkua nismës së Bashkisë së Tiranës, duke dhuruar module të ndryshme lojërash për këndin e fëmijëve në sheshin “Bajram Curri” në njësinë numër 7. Teksa inspektoi fillimin e punimeve, kryetari i Bashkisë së Tiranës, Erion Veliaj u shpreh se ky kënd lojërash shënon fillimin e bashkëpunimit me ambasadat për të çuar përpara projekte të ngjashme në kryeqytet.

Kryebashkiaku garantoi se edhe në gjysmën e dytë të mandatit, Bashkia e Tiranës do të vijojë punën për ndërtimin e hapësirave sportive dhe çlodhëse për fëmijët. Veliaj u shpreh optimist se ky bashkëpunim me ambasadën çeke për ndërtimin e këndeve të lojërave, do të ndiqet edhe nga përfaqësitë e tjera të akredituara në vendin tonë.

Ambasadori çek, Jaroslav Ludva e cilësoi këtë bashkëpunim me Bashkinë e Tiranës si shumë të rëndësishëm për brezat e rinj. Investimi për jetëzimin e sheshit “Bajram Curri” parashikon rikualifikimin estetik të zonës, përmes shtimit të gjelbërimit, ndriçimit dhe ndërtimit të infrastrukturës çlodhëse për të rritur. Po tek Njësia 7, Bashkia e Tiranës ka planifikuar ndërtimin edhe të dy shesheve të tjera, më konkretisht në rrugën “Sali Butka” dhe “Shefqet Musaraj”, duke e transformuar tërësisht këtë zonë.

Nertila Doko/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.