Ndërtuesit kundërshtojnë 3%-shin, Aleksi: Bllokon industrinë dhe rrit çmimet e apartamenteve

Ndërtuesit kanë kërkuar nga qeveria shfuqizimin e nenit të ligjit i cili ka hyrë në fuqi më 30 Maj, që i detyron ata të paguajnë 3 për qind për sipërfaqe ndërtimi 2 mijë metër katror, fond që shkon për shërbime sociale.

Duke e cilësuar si taksim të dyfishtë, ndërtuesit shprehen se ky ligj do të dëmtojë rëndë këtë industri dhe do të sjellë rritje të çmimeve të pasurive të paluajtshme. Ndërsa paralajmërojnë se do të marrin hapat e duhura ligjore deri në shfuqizimin e tij.

Në mbështetje të ndërtuesve janë edhe dhomat e tregtisë dhe shoqatat e bizneseve.  Kreu i Dhomës së Tregtisë dhe Industrisë Tiranë thekson se me këtë ligj, 30 për qind e fitimit të kompanive të ndërtimit shkon për këtë fond, duke shkaktuar bllokimin e industrisë.

Ndërsa të pyetur për listën e subjekteve që kanë braktisur pallatet duke mos përfunduar procesin e legalizimit, ndërtuesit bënë me dije se mbështesin iniciativën e ALUIZNI-t për shkelësit e ligjit, ndërsa theksuan se jo gjithnjë është faji i ndërtuesve, pasi ka subjekte që nuk po përmbyllin dot këtë proces për shkak të mbivendosjes së pronave dhe fotografimit që u është bërë.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.