Ndeshja me Italinë, Policia njofton masat – Pas takimit radarë e matës alkooli në akset rrugor
Në kuadër të ndeshjes me Italinës në datë 9 Tetor në stadiumin “Loro Boriçi” në Shkodër, Policia e Shtetit ka njoftuar në lidhje me masat e marra për sigurimin e këtij eventi.
Për të mos përsëritur problemet e ndeshjes Itali-Shqipëri në Palermo në muajin mars, njoftohet se nuk do të lejohen brenda stadiumit fishekzjarre, flakadanë, sende të forta, sende metalike, monedha apo çelësa, banderola që janë të ndaluara etj.
Gjithashtu të ndaluar janë edhe personat nga grupi i tifozëve “Illyria Elite”, shkaktarë për incidentet e muajit Mars. Policia këshillon tifozë që të hyjnë në stadium më herët, të pajisur me biletën dhe letërnjoftimi. Për këtë qëllim portat do të hapen në orën 17:00.
Ndërkohë pas ndeshjes mësohet se akset rrugore Morinë – Shkodër e Tiranë – Shkodër, do të monitorohen me radarë për matjen e shpejtësisë dhe do përdoren dragerat për pijet alkoolike.
Nga Italia pritet të ndjekin ndeshjen në stadium rreth 1200 tifozë. Prej tyre, rreth 500 pritet të vijnë enkas nga vendi fqinj, ndërsa rreth 700 tifozë pritet të jenë shtetas italianë me banim të përkohshëm në Shqipëri.
Sa i takon masave antiterror, njoftohet se po monitorohet për aktivitet të dyshimtë në rrjetet sociale dhe po bashkëpunohet me policitë dhe shërbimet informative të vendeve fqinje.
Në pikat e kalimit kufitar në Morinë, Muriqan, Hani i Hotit, Qafë Thanë dhe Durrës, një specialist i Drejtorisë Antiterror do të vendoset për të verifikuar, intervistuar, dhe vlerësuar lejen ose të kalimit të individëve me prirje radikalizmi ose ekstremizmi të vendosur në listë kontrolli “Njoftim në kufi”.
A.H./SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.