Ndëshkohen shoferët “rebelë”, 86 mijë gjoba për parkimet në Janar- Qershor 2019
Drejtuesit e automjeteve që kanë parkuar gabim në kryeqytet janë ndëshkuar me të paktën 1 mijë lekë për secilin rast. Vetëm në gjysmën e parë të vitit, Policia Bashkiake e Tiranës ka vendosur plot 86.677 gjoba për parkime kundër rregullave të qarkullimit, një shifër rekord kjo duke marrë parasysh se për të gjithë vitin 2018 u vendosën rreth 74 mijë masa administrative për këtë shkelje.
Megjithëse pothuajse në të gjithë Tiranën janë përcaktuar dhe vijëzuar vendparkimet e lejuara të automjeteve, të cilat janë bërë me pagesë, duket se qytetarët kanë anashkaluar rregullat, duke e pësuar dhe u ndëshkuar me masa administrative.
Sipas të dhënave zyrtare, muaji Janar ka qenë më problematiku në këtë drejtim, ku është evidentuar edhe numri më i lartë i shkeljeve me 17,910 gjoba, ndërsa në muajin Qershor janë marrë më pak masa administrative, në rreth 5800. Duke llogaritur se një gjobë ka vlerën e 1 mijë lekëve, rezulton se të ardhurat në buxhetin e Bashkisë për këtë periudhë të regjistrohen mesatarisht në rreth 87 milionë lekë.
Elisabeta Dosku/ SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.