Ndihmat shtetërore në BE – Rregullat lejojnë financimin publik të huadhënësve me probleme
Vendet anëtare të Bashkimit Europian mund të përdorin fondet publike për të ndihmuar bankat që gjenden në vështirësi me kredi të këqija, por vetëm brenda limitit ligjor të vendosur që prej krizës financiare, tregon një raport i Unionit.
Ndërkohë që ligjet në BE specifikojnë se nevoja për “mbështetje të jashtëzakonshme me financim publik”, nënkupton se një bankë po dështon dhe duhet të mbyllet, përjashtime bëhen për ndihmë të përkohshme shtetërore, të njohur si “rikapitalizim paraprak”, që trajton mungesën e kapitalit të identifikuar në stres-test.
“Është e mundur që Qeveritë të përdorin ndihmë të tillë për të financuar institucionet me aktive të dobëta”, thekson raporti. Sipas dokumentit, kushtet nën ligjin e Bashkimit Europian për të dhënë ndihmë shtetërore, duhet të mbikëqyren.
“Trajtimi i çështjes së kredive me probleme nuk duhet të përfshijë devijimin nga rregullat e unionit bankar”, shkruhet në raport. Kreu i Autoritetit Bankar Europian, Andrea Enria, ka mbështetur prej kohësh ndihmën e Qeverive drejt bankave që pësojnë humbje gjatë shitjes së kredive të këqija.
Ai i tha ligjbërësve së fundmi se ndihmat shtetërore mund të përdoren për t’i bërë ballë si ç’duhet problematikave në lidhje me cilësinë e aktiveve në sektorin bankar europian.
Përdorimi i parasë publike për të trajtuar humbjet e bankave mund të reduktojë borxhin e keq prej 1 trilionë euro dhe mund të hapë rrugën për programe të shpëtimit për vendet më me vështirësi të Bashkimit Europian.
Klevis Llaha/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.