Ndikimet e koronavirusit në ekonominë shqiptare- Operatorët turistikë 2 kërkesa qeverisë. Çfarë mund të ndodhë me biletat e anuluara
Situata e përhapjes së koronavirusit ka filluar të japë efekte negative në industrinë turistike. Efektet janë ndjerë pa u konfirmuar rastet e para në Shqipëri, dhe ashtu sikurse ka ndodhur globalisht, ka nisur anulimii në masë i rezervimeve të karakterit turistik.
Sipas Besnik Vathit, duke qenë se sektori i turizmit lidhet me argëtimin, është një ndër sektorët më të ndjeshëm pasi shpenzimet e para që ndërpriten janë ato për udhëtimin dhe sepse konsiderohet si jo i domosdoshëm.
“Ndikimi është në dy aspekte. Në aspektin e levizjes së shqiptarëve jashtë vendit për turizëm por edhe në atë pjesë të ardhjes së të huajve drejt Shqipërisë. Të dy janë sektorë të prekur. Marsi është periudha ku fillojnë lëvizjet e turistëve shqiptarë për të udhëtuar jashtë vendit. Frika nga koronavirusi e ka cuar shifrën 15 deri 20 herë më pak se çdo herë tjetër. Dihet për lëvizjen dhe ardhjen e të huajve drejt Shqipërisë, prenotimet nga turistët e huaj me kompanitë e tyre të udhëtimit bëhet 2-3 muaj para. Dhe kjo është periudha ku ata do të bënin prenotimet. Nga vetë lajmet, analizat që shohim dhe kontaktet që kemi me operatorët e huaj, prenotimet kanë shkuar drejt zeros dhe kanë filluar anullimet. Pritet një pranverë e zymtë edhe për turizmin në Shqipëri” tha Besnik Vathi i ftuar në “SCAN Update”.
Kërkesë për masa lehtësuese
Vathi tha se përfaqësuesit e agjencive turistike në vend janë mbledhur dhe kanë gati kërkesat për qeverinë shqiptare, në mënyrë që kjo e fundit të ndihmojnë në lehtësimin e kapërcimit të pasojave. Kërkesat kryesore janë për pezullimin e përkohshëm të tatim-fitimit që të mos shkohet drejt mbylljes së biznesit dhe pagesa nga ana e qeverisë e sigurimeve për punonjësit e sektorit.
“Ne nuk po kërkojmë para! Po kërkojmë të mos japim para se s’kemi ç’të fitojmë këtë vit për të dhënë fitimin e planifikuar. Dhe nëse nuk do të kemi ndihmën për heqjen apo pagesën nga qeveria për sigurimet shoqërore do të duhet të largojmë njerëzit nga puna. Do të ketë papunësi më të madhe dhe ata që do të largohen do të kërkojnë ndihmë sociale. Dhe qeveria përsëri do i paguajë. Më mirë t’i mbajmë në punë” tha Vathi.
Çfarë mund të ndodhë me biletat e anuluara
Ndalimi i fluturimeve ajrore, udhëtimeve detare apo i rezervimeve drejt Italisë ka shkaktuar gjtihashti një dëm të konsiderueshëm, ashtu sikurse ka ndodhru në trang global. Vathi shpjegon se aty ku ka pasur ndërhyrje shtetërore për bllokim dhe anullim, në ato vende kompanitë ajrore i kanë kthyer pagesat e tyre ose e kanë lënë për t’i zëvëndësuar me një udhëtim tjetër në në një kohë më të përshtatshme.
“Për ato vende ku nuk ka pasur ndërhyrje nga qeveria për anulimet, ato mbeten në vendimmarrjen e vetë kompanive ajrore dhe të udhëtimit. Që do të thotë se ata kanë të drejtë edhe të thonë nuk të kthejmë asgjë. Kjo ka ndodhur me shumë udhëtime që ishin parashikuar të beheshin në mars. Ka shumë humbje sidomos te kompanitë e udhëtimit dhe në këto kushte është e pamundur që t’u kthehen. Nga kompanitë ajrore apo hotelet në botë, nuk janë duke kthyer pagesat e marra përsipër” tha Vathi.
Duke nisur nga sot, drejt Italisë janë pezulluar të gjitha fluturimet ajrore dhe udhëtimet detare.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.