Ndikimi i rritjes së çmimeve te pensionistët – Buxheti i ISSH, Hado: Mund të përballojmë indeksimin deri në masën 3%

Gjatë vitit 2022 nuk parashikohet rritje e pensioneve, por vetëm indeksim me normën e inflacionit. Ndërkohë që, buxheti i Institutit të Sigurimeve Shoqërore mund të përballojë një indeksim deri në masën 3%.

Deklarata u bë nga kreu i këtij institucioni, Astrit Hado pas pikëpyetjeve të ngritura nga deputetja Albana Vokshi mbi mundësitë financiare të ISSH-së për indeksimin, pas rritjes së çmimeve të produkteve të shportës.

Hado foli edhe për defiçitin e skemës së pensioneve, që sipas tij është në masën 1.66% e Prodhimit të Brendshëm Bruto. Sipas Hados, në vitet e fundit skema është përmirësuar, por viti 2020 përbën një përjashtim për shkak të pandemisë së shkaktuar nga COVID-19.

Projektbuxheti i vitit që vjen parashikon edhe dhënin e bonusit të fundvitit prej 5 mijë lekësh për pensionistët, çka sipas Hados përbën një risi pasi kjo është hera e parë që ky fond buxhetohet që në fillim të vitit.

Ola Mitre / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.