Ndjesia ekonomike, niveli më i lartë nga 2019 – Arrin në 103.99 pikë, por besimi konsumator ende larg niveleve të para krizës

Treguesi i Ndjesisë Ekonomike (TNE) ka prekur nivelin e 103.99 pikëve gjatë muajit maj të këtij viti, nga 100.64 pikë që ishte gjatë prillit, tregojnë të dhënat më të fundit nga Banka e Shqipërisë. Kështu, ky tregues ka prekur nivelin më të lartë që prej korrikut të vitit 2019, kur fiksohej pranë 105 pikëve. Banka e Shqipërisë sqaron se, norma e majit rezulton mbi mesataren historike. Maji është muaji i gjashtë me radhë në rritje për këtë tregues. “Përmirësimi i Treguesit të Ndjeshmërisë Ekonomike në muajin maj reflektoi më së shumti rritjen e fortë të besimit në sektorët e shërbimeve dhe të tregtisë. Besimi konsumator u përmirësua gjithashtu, por në një masë më të vogël, ndërsa besimi në sektorin e industrisë mbeti në nivel të përafërt me atë të muajit të kaluar. Ndërkohë, besimi në sektorin e ndërtimit regjistroi rënie të lehtë, por duke mbetur pranë nivelit maksimal të pesë viteve të fundit”-nënvizon mes rreshtave Banka e Shqipërisë.

Sa i përket vetëm besimit konsumator, regjistrohet në rritje në muajin maj prej +2.6 pikë përqindje, i ndikuar nga përmirësimi në të katër pyetjet përbërëse: pritjet për situatën e përgjithshme ekonomike, pritjet për situatën e tyre financiare në të ardhmen, vlerësimin për blerjet në shuma të mëdha, si dhe pritjet për to. Pavarësisht prirjes rritëse, niveli i treguesit të besimit vijon të qëndrojë nën mesataren afatgjatë, prej fundit të vitit 2019.

Ndërkohë, sa i përket komponentëve të tjerë të TNE-së, Treguesi i Besimit të Industrisë u përmirësua për të gjashtin muaj rresht, me 0.3 pikë përqindje. Rritja në muajin maj u ndikua nga vlerësimet optimiste të bizneseve për nivelin e prodhimit. Bizneset u shprehën optimiste për rritjen e prodhimit dhe gjendjes së punësimit në të ardhmen. Ndërkaq, Besimi në Ndërtim shënoi rënie të lehtë në muajin maj prej -1 pikë përqindje, pas rritjes së konsiderueshme prej +10.9 pikësh  një  muaj  më  parë. Edhe Treguesi i Besimit në Shërbime është rritur ndjeshëm gjatë majit, me 5.6 pikë, duke u zhvendosur mbi mesataren afat-gjatë, për herë të parë që nga fillimi i pandemisë. Besimi  në  Tregti regjistroi  rritje  të  fortë  në  muajin  maj  (+8.8 pikë  përqindje), i  ndikuar  kryesisht  nga vlerësimet pozitive të bizneseve për ecurinë e shitjeve.

Roel Korkuti / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.