Ndotja e mjedisit – Klosi: Masa për makinat e vjetra, lehtësi fiskale për të rejat
Qeveria do të ndërmarrë masa për të penguar futjen në Shqipëri të makinave të vjetra dhe do të inkurajojë, përmes lehtësimeve fiskale, futjen e makinave të reja në treg. Kjo ishte një ndër masat që do të ndërmarrë qeveria shqiptare në kuadër të eliminimit të ndotjes së mjedisit.
Gjatë një prononcimi për mediat nga panairi i makinave, Ministri i Mjedisit dhe Turizmit, Blendi Klosi, u shpreh se masa do të merren edhe në përmirësimin e cilësisë së karburantit si edhe nxitjen e investitorëve privatë në transportin publik.
“Masa të reja edhe fiskale për të ndihmuar futjen e makinave të cilat premtojnë ndotja sa më të paktë të mjedisit, nxitjen e masave për importimin e mjeteve euro-4 dhe euro-5 dhe euro-6 tashmë, përmirësuar cilësinë e karburantit që tregtohet në Shqipëri, rritjen e ndërgjegjësimit publik, nxitjen e iniciativave ekonomike të transportit publik dhe atij ekologjik, nxitjen e investimeve private në transportin publik”, tha Ministri.
Më tej Klosi u ndal tek varrezat e makinave, ai u ka kërkuar përfaqësuesve të kësaj industrie shpërbërjen e tyre.
“Të biem në një dakordësi. Ç’do të ndodhë me varrezat e makinave? Ç’do ndodhë me makinat të cilat tashmë janë krejtësisht jashtë përdorimit? A do duhet të jenë ato pjesë e një realiteti të ndotur apo do të kemi teknologji të reja, të cilat ju i dini shumë më mirë se sa ne administratorët publikë, se si këto makina shpërbëhen dhe ajo që ndodh në fakt në të gjithë rajon, padyshim në të gjithë Europën, këto makina të vjetra asimilohen deri në masën 98%”, u shpreh Klosi.
Aktualisht në vendin tonë janë 560 mijë automjete me një jetëgjatësi mbi 20 vite ku 80% e tyre rezultojnë ndotëse për mjedisin. Sipas ISHP ndotja e mjedisit vitet e fundit është bërë shkak i mbi 40 mijë lloje sëmundjesh, kryesisht në aparatin e frymëmarrjes.
Nertila Doko/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.