Ndryshim i dytë i buxhetit – Shkak situata energjetike, OSHEE ka kërkuar 4-7 mld lekë
Situata e vështirë energjitike, e ardhur si pasojë e thatësirës së tejzgjatur, pritet të pasohet nga një ndryshim i dytë i buxhetit të shtetit. Gjatë një interviste në TV SCAN, drejtori i Divizionit të Shitjes dhe Tregtimit në OSHEE, Elton Sevrani tha se tashmë është bërë kërkesa pranë ministrisë së Financave dhe kryeministrisë, pasi në kushtet aktuale kompania mund të sigurojë blerjen e energjisë, por nuk mund të bëjë mirëmbajtjen e rrjetit. Sipas Sevranit, ende nuk dihet vlera e saktë, por ajo varion nga 4-7 miliard lekë.
“Kjo situatë është e vështirë. Ne u jemi drejtuar institucioneve të Ministrisë së Financave, ministrisë së linjës, si dhe kryeministrisë për një financim nga buxheti i shtetit, duke patur parasysh që në këto kushte ne ngelemi thjesht në shpenzimet operative dhe në blerjen e energjisë. Por, mirëmbajtja e rrjetit, që është një nga detyrat primare, duhet të realizohet me një suport financiar jashtë kompanisë.
Sa është vlera e kërkuar nga buxheti?
Vlerat janë variabël sepse nga muaji në muaj ne mund të kemi ndryshime. Vetëm në këtë muaj nuk kemi të garantuar do të jetë 5 apo 15 milionë për blerjen e energjisë, që nënkupton një rritje nga 4 deri në 7 miliardë”, u shpreh Sevrani.
Përmes një Akti Normativ të muajit gusht, qeveria shqiptare shtoi 3 miliard lekë për përmbushjen e nevojave për energji elektrike, ndërkohë që në seancën parlamentare të së enjtes akti u miratua me 73 vota pro.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.