Ndryshime në ekonomitë më të mëdha të BE – Gjermania “ndryshoi faqen”, Franca dhe Italia mbase me politikanë të rinj
Balanca e pushtetit po ndryshon në tre ekonomitë më të mëdha të bashkimit Europian, që mund të ketë ndikime domethënëse në tregjet financiare. Gjermania sapo e ktheu faqen e historisë me largimin e Angela Merkel, e cila shërbeu për 16 vite si kancelare, Franca po përgatitet për zgjedhjet presidenciale në pranverë, ndërsa Italia po pret me ankth të zbulojë nëse Mario Draghi do të largohet nga posti i kryeministrit për tu bërë president.
Qeveria e sapokrijuar në Gjermani ka premtuar se do të dekarbonizojë ekonominë dhe do të investojë në dixhitalizim. Në të njëjtën kohë, qeveria synon të ndjekë një politikë fiskale të shëndoshë duke filluar nga viti 2023, kur pandemia të ketë përfunduar. Ekonomia gjermane u rrit me 2% në tremujorin e dytë të vitit 2021 dhe me 1.7% në të tretin. E njëjta tendencë pritet të ketë qenë edhe në tremujorin e fundit të vitit të kaluar.
Në Francë, ndërkohë, votuesit do ti drejtohen kutive të votimit në fund të prillit. Presidenti aktual, Emmanuel Macron, nuk ka njoftuar ende nëse do të rikandidojë për një mandat të dytë. Gjithsesi, ai është ende në vend të parë, mes kandidatëve të tjerë, sipas sondazheve. Por, jemi ende shumë larg zgjedhjeve dhe sondazhet e votuesve mund të ndryshojnë, aq më tepër që kandidatë të rinj po zyrtarizojnë planet e tyre për presidencën. Sidoqoftë, një vitore e Macron do të nënkuptonte se Franca do të kishte ende një udhëheqës pro europian, i cili dëshiron të punojë me Francën dhe Itali për të reformuar rajonin.
Në Itali, por edhe jashtë saj, të gjithë duan të dinë nëse Mario Draghi do të vazhdojë të jetë kryeministër i vendit, apo do të preferojë të jetë presidenti i ardhshëm. Skenari i dytë do të sillte një vale të re të pasigurive politike, për shkak të fragmentarizimit të parlamentit italian.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.