Ndryshimet në skemën e furnizimit të cigareve – 1 janar 2018, data për aplikimin e çmimit të ri
Drejtoria e Përgjithshme e Tatimeve ka publikuar sot udhëzimin e ri për ndryshimet që do të bëhen në skemën e furnizimit të cigareve.
Ndryshe nga udhëzimi i vjetër, i riu parashikon që me qëllim llogaritjen dhe pagesën e TVSH-së sipas çmimit të ri, do të ngarkohen të gjitha hallkat e rrjetit të furnizimit të cigareve për të deklaruar inventarin gjendje brenda një periudhe prej 5 ditëve punë nga aplikimi i çmimit të ri.
Në bazë të udhëzimit, importuesi apo prodhuesi i cigareve duhet të llogarisë stokun e produktit gjendje të shitësve me pakicë pa TVSH. Kjo do të bëhet bazuar mbi sasitë e shitura prej tij gjatë 90 ditëve të fundit para aplikimit të çmimit të ri, ku llogarit shitjet mesatare ditore.
Sa i takon rasteve kur një markë cigaresh ka më pak se 90 ditë që furnizohet në treg, në udhëzim thuhet se :”për llogaritjen e shitjes mesatare ditore merren ditët faktike nga dita e parë e furnizimit të kësaj marke cigareje.”
Udhëzimi i ri përcakton furnizuesin kryesor si përgjegjës kryesor për TVSH-në shtesë për vlerën e rritur nga rritja e çmimit me pakicë, për stokun gjendje të shitësit me pakicë duke u bazuar në furnizimin mesatar ditor shumëzuar me 30%.
Lidhur me sasinë e stokut të llogaritur sipas kësaj mënyrë, bazuar në udhëzimin e ri, furnizuesi kryesorë duhet të lëshojë një faturë për vete, ku llogarit, deklaron si dhe paguan TVSH-në për vlerën e rritur nga rritja e çmimit me pakicë.
Paketa e re fiskale fiskale u shoqërua me një rritje të taksës së akcizës mbi furnizimin e cigareve. Si rrjedhojë, udhëzimi i ri parashikon datën 1 Janar të vitit 2018 si datën e aplikimit për çmimin e ri, e cila detyron të gjithë furnizuesit e cigareve që të deklarojnë inventarin gjendje të këtij produkti të datës 31 Dhjetor 2017.
G.Dobra/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.