Ndryshimi i matësve të energjisë/ Zgjidhet konsulenti që do të hartojë strategjinë, do përcaktojë nëse do jepet me PPP!
Njësia e Menaxhimit të Projektit të Rimëkëmbjes së Energjisë ka përzgjedhur konsulentin që do të hartojë Strategjisë së Matjes, i cili ndër të tjera do të përgatisë dhe studimin e fizibilitetit mbi mundësinë e ndryshimit të matësve aktualë me matës inteligjentë. Përveç të tjerash konsulenti do të duhet të analizojë nga pikëpamja ekonomike ofrimin e këtij shërbimi nga sektori privat, përmes një partneriteti publik-privat.
Referuar dokumenteve, fitues është shpallur një konsorcium shqiptaro-slloven (JV “AT Kearney Svetovanje” doo & “Abkons” ltd), që do të ketë në disozicion 9.5 muaj kohë për hartimin e dokumentit, të cilit do t’i referohen në të ardhmen institucionet e linjës.
Më herët, i pyetur nga TV SCAN, nëse OSHEE ka kapacitete për ta ofruar vetë këtë shërbim, drejtori i Divizionit të Tregtisë pranë OSHEE, Elton Sevrani thotë se do të jetë konsulenti ai që do ta përcaktojë.
Por sipas, tij kalimi nga matësit aktualë, në matës inteligjentë vendos një marrëdhënsi më të drejtë me konsumatorët, për shkak të saktësisë në të dhëna që ofrojnë këto pajisje.
Ndërkaq, edhe Ministria e Infrastrukturës dhe Enerjisë ka deklaruar se strategjia do të ndihmojë institucionet e linjës në vendimmarrje për politika të qarta në zgjedhjen e standardeve të matjes së energjisë elektrike, që do të ndiqet në të ardhmen.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.