Ndryshimi i projektit të Unazës – ARRSH rihap tenderin 32.3 mln lekë, akordon 6.9 mln lekë për 2018
Autoriteti Rrugor Shqiptar ka akorduar 6.9 milion lekë për vitin 2018, që do të shkojnë për projektimin e ri të segmentit të Unazës së Madhe që do të lidhë sheshin Shqiponja me bulevardin e ri të Tiranës. ARRSH ka rihapur tenderin për kompanitë e interesuara, ndërkohë që në total i gjithë shërbimi do të kushtojë 32.3 milion lekë. Në dokumentet e shpallur të tenderit dikasteri i rrugëve saktëson se pjesa e mbetur e vlerës është parashikuar për vitin 2019.
Projekti i ri parashikohet të shtrihet në Veri te kryeqytetit ose ne Jug te Njësisë Administrative të Paskuqanit.. Objekti do të fillojë në pikën e sotme fundore që është segmenti nga mbikalimi i pallatit me shigjeta te rrethrrotullimi Shqiponja dhe do të vazhdojë përgjatë rrugës ”Vangjel Noti”. Më pas do të kryqëzohet me rrugën:” Adem Jashari”, do të vazhdojë në një zonë ndërtimesh te reja e deri ne shtratin e Lumit te Tiranes.
Më pas parashikohet të vazhdojë më tej me kalimin e lumit te Tiranes përmes një ure 60 metra, ku më pas do te zhvillohet ne krahun e majte të lumit të Tiranës ne krah te kodrave te Paskuqanit deri ne piken e takimit me Bulevardin e ri te Tiranes me një gjatësi rreth 3.6 km. Ndërtimi i këtij segmenti të ri pritet të lehtësojë lëvizjen e trafikut në një nga zonat me problematikë të Tiranës si dhe të krijojë një infrastrukturë bashkëkohore për lëvizjen e mjeteve, të këmbësorëve dhe biçikletave.
Ola Mitre/SCAN
[FOTO] Si do të duket Unaza e Madhe – Ja detajet e projektit me vlerë mbi 4.8 mld lekë
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.