Ndryshimi i projektit të unazës. Pas 2 vitesh, ARRSH rihap tenderin 32.3 mln lekë për një segment të ri

Autoriteti Rrugor Shqiptra ka hapur një tender për projektimin e segmentit të ri të Unazës së Madhe që do të lidhë sheshin Shqiponja me bulevardin e ri të Tiranës. Fondi limit për realizimin e projektit është 32.3 mln lekë, ndërkohë që kompanitë e interesuara do të duhet të dorëzojnë oferta e tyre deri në datën 9 shtator. Megjihatë, kjo nuk është hera e parë që ARRSH hap tenderin për projektimin e këtij segmenti. Kjo pasi, edhe  përgjatë vitit 2018 u kërkua projektimi i këtij segmenti, por mesa duket edhe pas 2 vitesh procedura është ende në fazë tenderimi.

Objekti do të fillojë në pikën e sotme fundore që është segmenti nga mbikalimi i pallatit me shigjeta  te rrethrotullimi Shqiponja dhe do të vazhdojë përgjatë rrugës ”Vangjel Noti”. Më pas do të kryqezohet me rrugen:” Adem Jashari”, do të vazhdojë në një zonë ndërtimesh te reja e deri ne shtratin e Lumit te Tiranes. Më pas parashikohet të vazhdojë më tej me kalimin e lumit te Tiranes përmes një ure ku më pas do te zhvillohet ne krahun e majte të lumit të Tiranës ne krah te kodrave te Paskuqanit deri ne piken e takimit me Bulevardin e ri te Tiranes me nje gjatesi rreth 3 km.

Ndërtimi i këtij segmenti të ri pritet të lehtësojë lëvizjen e trafikut në një nga zonat me problematikë të Tiranës si dhe të krijojë një infrastrukturë bashkëkohore për lëvizjen e mjeteve, të këmbësorëve dhe biçikletave.

Ola Mitre / SCAN 

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.