Ndryshimi i punës! Si të lajmërojmë largimin nga puna e vjetër, në mënyrë strategjike
Në momentin kur ju vendosni për të ndryshuar vendin e punës, do të thotë se keni një plan të suksesshëm, të cilin e bluani nën vete. Përpos kësaj, ju duhet gjithashtu të shpenzoni një pjesë të mirë kohe, për të përgatitur edhe planin e komunikimit të këtij vendimi, te institucioni, apo kompania ku punoni. A është kjo një gjë e domosdoshme?
Nëse shihet në një këndvështrim më të theksuar, ky është një shans mjaft i mirë, për të folur për ish-kolegët; për të hartuar një kuadër të arritjeve tuaja profesionale, në mënyrën më të mirë të mundshme, si dhe për të pozicionuar lëvizjen tuaj, si një lajm i mirë , i cili është shumë i rëndësishëm për të ndërtuar të ardhmen e karrierës suaj. Përpara se të bëni një gjë të tillë, ju këshillojmë disa strategji, të cilat mund të jenë të domosdoshme për ju.
Mos jepni “shenja” digjitale, përpara se të jeni gati për ta bërë publike
Sot jetojmë në epokën e rrjeteve sociale dhe informacioni i përhapur në to ka një shpejtësi të madhe. Së pari, ju nuk duhet të jepni informacion rreth ikjes suaj në mediat sociale, përpara se të keni “kopsitur” gjithçka, si për shembull, të mos bëni “check-in” në vendet ku intervistoheni për punë; të mos hidhni foto; të shmangni ndjekjen e kolegëve tuaj të ardhshëm në rrjetet sociale, apo me shefin tuaj të ardhshëm.
Nëse për ju do të jetë e domosdoshme për të kontaktuar me ta, ju nuk duhet ta bëni këtë në mediat sociale, por duhet të zgjidhni e-mailin, apo edhe shkresat me dorë. Kjo mund të tingëllojë disi paranojake, por nuk i dihet, pasi kompanisë suaj ku punoni aktualisht mund t’i shkojë informacion, që ju nuk do të donit ta ndanit me të. Prisni për momentin e duhur, derisa t’ju vijë lajmi për konfirmimin e vendit tuaj të ri të punës, e më pas vendosni, nëse do bëni publike diçka, ose jo.
Hartoni një mënyrë promovimi
Promovimi, zakonisht, është një zhargon, i cili përdoret për të reklamuar në treg një produkt të ri. Në botën e sotme, ju dhe marka juaj jeni njëlloj si një produkt i ri, ashtu siç mund të jetë një aplikacion i ri në treg. Në këtë mënyrë, ju duhet të keni strukturuar një plan të mirëmenduar, për kohën se kur, apo ku do të bëni publik largimin tuaj.
Nëpërmjet tij, ju do të informoni të gjithë ata që shihni si të udhës që duhet të jenë në dijeni të zhvendosjes suaj, nga vendi aktual i punës. Vendi ku ju dëshironi të bëni publik lajmërimin tuaj mund të jetë cilado prej llogarive që ju zotëroni në rrjetet sociale, siç mund të përmenden Facebook, Twitter, apo LinkedIn. Nga ana tjetër, ju nuk duhet të harroni edhe të përditësoni informacionin në llogaritë tuaja, të cilat i përdorni më rrallë.
Lajmëroni për ikjen; bëni pushim, e më pas, publikoni rolin e ri
Si fillim, ju duhet të lajmëroni për largimin tuaj nga vendi i punës, i cili duhet të jetë lavdërim për kolegët dhe ish-drejtuesit tuaj. Më pas, në një lajmërim tjetër, të ndarë nga i pari, ju duhet të detajoni rolin tuaj të ri. Nuk ka rregulla të mirëpërcaktuara rreth kohës së lajmërimit që ju jeni larguar dhe se çfarë do bëni më vonë, por përpiquni të lini pak hapësirë.
Kjo, jo vetëm që respekton të dyja kompanitë, por edhe ndërton një lloj suspanse dhe interesi rreth asaj çka do të vijë më vonë. Ky afat kohor mund të zgjasë një javë, por edhe më shkurt, si për shembull: mund të falënderoni dhe përshëndesni kompaninë ku keni punuar, ditën e premte dhe të bëni publik rolin tuaj të ri, në një kompani tjetër, në ditën e hënë. Le të shpjegojmë disa gjëra që duhen patur parasysh, në momentin kur ju vendosni të bëni publik largimin tuaj nga puna:
Tregoni mirënjohjen tuaj të thellë në publikim. Mendoni se çfarë do t’ju mungojë më shumë kur të ndërroni mjedis pune; çfarë ju ka pëlqyer më shumë, si dhe bëni atë pikë referimi. Ky është një veprim që tregon klas, si dhe do të përhapë një klimë të mirë e pozitive, për të gjithë ata që ndihen të përfshirë në të. Nuk duhet të harroni që lajmërimi duhet të jetë gjithnjë pozitiv. Nuk ka rëndësi se për çfarë motivesh largoheni nga vendi i vjetër i punës; ju nuk duhet të shfaqni nota negative.
Përditësoni titullin tuaj të ri, në të gjitha profilet tuaja sociale
Pasi të keni bërë të dyja lajmërimet, bëhuni gati për të përditësuar profilet tuaja në rrjetet sociale. Hapini të gjithë, njëri pas tjetrit, dhe pastaj ngjisni të gjithë informacionin e ri, në fushat përkatëse, duke i kontrolluar nëse nuk keni bërë gabime. Nëse, përkundrazi, vendosni që të bëni pak pushim, nga momenti kur keni lajmëruar për largimin nga puna, qëndroni të heshtur për pak kohë në rrjetet sociale. Kjo mund të bëjë që të tjerët të mendojnë se po shkoni diku me një pozicion më të lartë, për faktin se po ikni nga kompania e vjetër. Pas pak ditësh, ju mund të bëni publik edhe pozicionin tuaj të ri, në vendin e ri të punës.
Merrni në shqyrtim një plan shpërndarjeje
Nëse ju keni një rol të rëndësishëm pune, apo jeni person publik, duhet të mendoni të angazhoni rreth jush edhe median. Bëni një plan dhe lajmëroni disa reporterë, me qëllim që gjithçka të jetë e organizuar mirë. Askush më mirë se ju nuk do të flasë mirë për lëvizjen tuaj të radhës. Synoni blogjet, apo faqet informative në internet, të cilat i përkasin më së shumti fushës suaj. Angazhoni gjithashtu edhe ato agjenci, të cilat i kushtojnë hapësirë lajmeve për lëvizjet e personave publike, në vende të tjera, duke u siguruar që të jeni drejtuar te gazetari i duhur.
Pavarësisht se nuk ka rregulla të mirëcaktuara që lidhen me atë çka ju vlerëson ju për të qenë në vëmendjen e mediave, të paturit 8-10 vite eksperiencë do të ishte një e dhënë mjaft e mirë për ju. Momenti i ndërrimit të vendit të punës do të ishte një kohë e mirë për të bërë përpjekje për të dalë në një intervistë, apo për të folur rreth lëvizjes suaj, duke ndarë edhe mendime. Ju nuk duhet të shkurajoheni nëse nuk ia arrini menjëherë, pasi gazetarët zakonisht janë të zënë dhe lajmi që ju keni ndërruar vend pune mund të mos jetë aq i madh sa për ta mbuluar ata, por një ditë mund të jetë.
Renato Hysenllari/SCAN Magazine
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.