Ndryshojnë rregullat për lëvizjen në zonën Shengen – Ja çfarë përfshin plani i masave të reja të BE për udhëtarët
Parlamenti Europian ka vendosur rregulla të reja për të gjithë udhëtarët që lëvizin në zonën Shengen pa viza. Plani i masave i miratuar më 5 korrik parashikon plotësimin e një formulari online nga udhëtarët para nisjes së tyre drejt vendeve të zonës Shengen.
Ato do të duhet të plotësojnë të dhënat personale (emër, mbiemër, gjininë, kombësinë, datën dhe vendin e lindjes) si dhe të dhëna të tjera që lidhen me çështje të tilla si ndjekje penale të mëparshme përmes sistemit të ri europian për Informacionin dhe Autorizimin e Udhëtimit (Etias).
Përmes këtyre rregullave të reja synohet zbulimi i kriminelëve, terroristëve apo i individëve të tjerë që paraqesin rrezik para se të arrijnë në BE.
Sa i takon situatës aktuale, rezulton se ka mungesë informacioni lidhur me njerëzit nga vendet që nuk kërkojnë vizë kur udhëtojnë në vendet e BE-së. Momentalisht ato kontrollohen në kufirin Shengen ku mbërrijnë. Vendimi për të lejuar ose mohuar hyrjen është bërë nga rojet kufitare pa e ditur nëse personi konsiderohet i rrezikshëm apo jo.
Kjo do t’i lejojë autoritetet të vlerësojnë nëse dikush mund të paraqesë rrezik para se të arrijnë në kufirin Shengen. Në rast se po, hyrja e tyre mund të refuzohet nga autoritetet përkatëse.
Autorizimi do të kushtojë vetëm 7 euro dhe do të jetë i vlefshëm deri në 3 vjet. Ndërkohë, është parashikuar të jetë falas për personat nën 18 vjeç dhe ato mbi 70 vjeç. Pritet që shumica dërrmuese e aplikantëve të marrin autorizimin pothuajse menjëherë. Vendimi përfundimtar për hyrjen në vendet e BE mbetet me rolin e kufirit kombëtar.
Aplikimet do të përpunohen automatikisht dhe në rast se evidentohen persona ‘të rrezikshëm’, vendimi duhet të merret brenda katër javëve. Refuzimet duhet të justifikohen dhe kërkuesi ka të drejtë ankese.
Hapat e ardhshëm
Propozimi i miratuar nga Parlamenti Europian do të duhet të miratohet zyrtarisht nga Këshilli i Ministrave. Më pas, Etias mund të jetë funksional në vitin 2021, i cili do të punojë përveç sistemit të kufijve të zgjuar të kontrollit për njerëzit që hyjnë në BE, që pritet të vihet në punë deri në vitin 2020.
G.D/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.