Ndryshon “fytyra” e Pallatit të Kongreseve – Shpallet tenderi me fond 9.8 milionë lekë për fasadën e ndërtesës

Drejtoria e Shërbimeve Qeveritare ka shpallur një tender me fond 9.8 milionë lekë, për Pallatin e Kongreseve. Objekti i tenderit është “Suvatimi me suva plastike i fasadës”.

“Gjendja e përgjithshme strukturale e godinës paraqitet të jetë e mire. Pjesën më të madhe në përqindje në veshjen e fasadës e zë xhami struktural i cili gjithashtu paraqitet në gjendje të mire. Probleme të degradimin paraqesin vetëm pjesët e strukturës të suvatuara me suva plastike. Për këtë arsye lind nevoja për pastrim, riparim apo zëvendësim të shtresave të dëmtuara dhe zëvendësimi i tyre me shtresa të reja dhe materiale rezistente, duke rritur sigurinë dhe aspektin estetik të këtij objekti me rëndësi të veçantë” specifikohet në dokumentacionin bashkangjitur tenderit.

Tenderi i shpallur në Agjencinë e Prokurimit Publik do të qëndrojë i hapur deri më 16 mars dhe ka një afat kohor për ekzekutim prej 45 ditësh, që nga nënshkrimi i kontratës me subjektin fitues.

Jenida Vladi/ SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.