Ndryshon Kodi i Familjes! Kërkesat për birësim nga të huajt ose shqiptarët jashtë, në gjykatën e qytetit të të miturit

Një seri ndryshimesh thelbësore pritet të ndërmerren në Kodin e Familjes, synimi kryesor i të cilavë është përmirësimi i procedurave të birësimit. Ministria e Drejtësisë ka hedhur për konsultim publik draftin për disa shtesa e ndryshime në Kodin e Familjes, të cilat ndryshojnë raportin e moshës mes birësuesve e të birësuarve, subjektet që jejohen ta bëjnë këtë, garancitë apo personat që kanë përparësi.

Ndërkaq, një prej momenteve më të rëndësishme të ndryshimeve janë procedurat e birësimit për shtetasit e huaj apo shqiptarët me banim jashtë kufijve.

Në nenin 12 të projektligjit, përcaktohen ndryshime në nenin 254 të ligjit, që lidhen me paraqitjen e kërkesë nga shtetasit shqiptarë pranë gjykatës ku ka vendmbanimin personit që kërkon të birësojë. Kërkesa për birësim, e bërë nga një shtetas i huaj ose shqiptar që banon jashtë shtetit, paraqitet në gjykatën nën juridiksionin e së cilës ndodhet vendbanimi i të miturit.  Kërkesa për birësimin e të miturit shqiptar që banon jashtë shtetit paraqitet në gjykatën e rrethit gjyqësor Tiranë.

Birësimi ndërvendas lejohet pasi fëmija ka qëndruar në pritje për 6 muaj në listat e komitetit shqiptar të birësimit dhe, gjatë kësaj periudhe, janë ezauruar të gjitha mundësitë  për të  bërë  birësimin  brenda vendit.

Komiteti Shqiptar i Birësimit, nisur nga interesi më i lartë i fëmijës, me vendim të motivuar, mund të japë pëlqimin për birësimin e fëmijës jashtë vendit, dhe pa u përmbushur afati 6 mujor, nëse fëmija ndodhet në një nga rrethanat e mëposhtme:

a) shëndeti i fëmijës mund të dëmtohet dhe ai ka nevojë për trajtime mjekësore të specializuara;

b) fëmija është me aftësi të kufizuara intelektuale ose fizike;

c) fëmija është mbi një moshë që e bën të pamundur birësimin e tij brenda vendit;

d) fëmija ndodhet në rrethana të tjera të rënda sociale, familjare, psikologjike, emocionale etj, të cilat e vështirësojnë ose e bëjnë të pamundur birësimin e tij brenda vendit.

Lorenc Rabeta/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.