Ndryshon Ligji Organik i Buxhetit – Denaj: Ekonomia mori dy goditje, balanca primare do të jetë negative në 2020

Dy goditjet e njëpasnjëshme që mori ekonomia shqiptare në një hark kohor shumë të shkurtër, ku e para ishte tërmeti i 26 Nëntorit dhe më pas pandemia COVID-19, shkaktuan përkeqësim të parametrave kryesorë të financave publike,  duke e detyruar Ministrinë e Financave të ndërhyjë në Ligjin Organik të Buxhetit duke vendosur rregulla të reja fiskale.

Ndryshimet u bënë përmes një akti normative të paraqitur në Kuvend nga Ministrja e Financave Anila Denaj. Akti parashikon që duke filluar që prej vitit buxhetor 2023 e në vijim balanca primare e buxhetit të rezultojë së paku neutrale ose pozitive  dhe nuk duhet të rezultojë më e vogël sesa zero, përveçse në rastet e rrethanave të jashtëzakonshme.

Pandemia dhe Tërmeti i 26 nëntorit do të rrisin ndjeshëm borxhin publik, i cili në fund të këtij viti parashikohet të arrijë nivelin 80% të Produktit të Brendshëm Bruto.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.