Ndryshon ligji i ushqimit – Forcohet kontrolli në pikat e inspektimit kufitar

Projektligji i ri i ushqimit sjell ndryshime të rëndësishme në këtë sektor, duke qartësuar disa pika të ligjit aktual si dhe probleme të shumta që hasen në importin dhe eksportin e produkteve ushqimore. Zv/ministrja e Bujqësisë Ermira Gjeci ka takuar përfaqësues të disa prej shoqatave kryesore të prodhueseve dhe industrisë përpunuese në vend, të cilët janë njohur më në detaj me ndryshimet kryesore të ligjit nr. 9863, datë 28.1.2008 “Për ushqimin”.

“Këto janë ndryshime të cilat kanë të bëjnë me pjesën e riskut, vlerësim, menaxhim dhe komunikim. Ka ndërthurje me ligjin e veterinarisë, të cilin e kemi nëpër duar dhe atë për rishikim dhe në ligjin e veterinarisë parashikohet që AKU-ja fillon kontrollin nga ferma dhe deri në tavolinë, prandaj duke ndërthurur ligjin e veterinarisë me ligjin e sigurisë ushqimore, janë riparë dhe kompetencat e AKU-së.

Projektligji parashikon rregullimin e dispozitave në lidhje me import-eksportet, duke u fokusuar në dokumentacionin shoqërues dhe kontrollin që kryhet në pikat e kontrollit kufitar.

“Së dyti janë riformuluar dhe përmirësuar dispozitat  në lidhje me dokumentacionin që shoqëron ngarkesat e produkteve ushqimore që importohen apo eksportohen nga Republika e Shqipërisë. Në ligjin aktual nuk mbulohen produktet me origjinë jo-shtazore dhe janë të paqarta kërkesat për produktet me origjinë shtazore. Këto janë rregulluar me projekt ligj. Gjithashtu kontrolli në pikat e inspektimit kufitar është jo i plotë, në projekt ligj janë përcaktuar dispozitat të cilat përafrojnë legjislacionin tonë me atë të BE, me praktikat e kontrollit në PIK.”

Konkretisht ndryshimet konsistojnë edhe në qartësimin e kompetencave mes ministrisë dhe AKU-së në lidhje me programimin dhe implementimin e analizës së riskut si dhe riorganizon bordin e AKU-së, duke i dhënë pavarësi dhe një rol aktiv me kompetencave të qarta.

Elisabeta Dosku/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.