Ndryshon mënyra e lëvizjes drejt BE – Ja çfarë duhet të bëjnë shqiptarët para se të arrijnë në kufi

Parlamenti Europian ka vendosur të rrisë masat e sigurisë për të ndaluar hyrjen në kufijtë e BE të kriminelëve, terroristëve, apo kujtdo që përbën rrezik. Masat nuk do të zbatohen në kufi, por do të krijojnë një kusht për qytetarët që lëvizin drejt vendeve të BE që përpara se ata të nisen.

Shtetasit e 60 vendeve që udhëtojnë pa viza drejt BE-së, përfshirë edhe Shqipërinë, do të duhet të regjistrohen online përpara se të nisen. Formulari elektronik do të kërkojë dokumentet e udhëtimit, të dhënat personale si emrin, vendlindjen dhe datëlindjen, gjininë dhe kombësinë.

Gjithashtu do të ketë pyetje në lidhje me precedentët kriminalë dhe prezencën e tyre në zonat e konfliktit. Kjo do të lejojë autoritetet të vlerësojë nëse dikush përbën rrezik që përpara se ai të arrijë në kufijtë e zonës Schengen.

Regjistrimi online, raporton SCAN, duhet të bëhet të paktën 4 javë përpara datës së udhëtimit, ndërsa në rast miratimi vlefshmëria e autorizimit do të jetë 3-vjeçare. Kjo do të thotë se për 3 vite të tjera nuk do të keni nevojë të kryeni të njëjtin proces. Autorizimi do të kushtojë 7 euro, ndërsa në rast refuzimi, individët do të kenë të drejtën të apelojnë vendimin.

Një model i ngjashëm zbatohet tashmë edhe në SHBA, Kanada dhe Australi. Sistemi i quajtur Etias pritet të nisë funksionimin në vitin 2021.

Angelo Haruni/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.