Ndryshon tarifa e pastrimit – Preken 3 njësi administrative në Tiranë, aplikimi nga 2018
Tarifa e pastrimit për banorët e Njësive Administrative Dajt, Farkë dhe Kashar do të barazohet me nivelin e tarifës brenda qytetit të Tiranës, duke shkuar në 5000 lekë nga 2000 lekë që është aktualisht. Gjithçka parashikohet në një projektvendim të Këshillit Bashkiak të Tiranës, i cili pritet të miratohet në mbledhjen e 28 shtatorit.
Sipas relacionit, që shoqëron projektvendimin, bazuar në ndryshimet e Planti Rregullues të Tiranës, një pjesë e zonave, që deri pak kohë më parë cilësoheshin rurale, janë shndërruar në zona urbane, në të cilat trajtimi i mbetjeve është i unifikuar më atë të zonës qendrore.
Mbështetur në këtë argument, shihet i nevojshëm rregullimi i tarifës së trajtimit të mbeturinave për disa zona të konsideruara deri më tani rurale, në të cilat niveli i mbetjeve urbane dhe kosto e shërbimit për trajtimin e tyre është i njëjtë me nivelin e shpenzimeve të tyre brenda qytetit.
Për këtë arsye Këshilli Bashkiak ka propozuar njehsimin e nivelit të tarifës së pastrimit në zonat e Dajtit, Farkës dhe Kasharit, me nivelin e tarifës që aktualisht aplikohet për brenda Tiranës. Mbledhja dhe arkëtimi i saj do të kryhet nga Ujësjellës Kanalizime, çka do të thotë se do të jetë pjesë e faturës së ujit, ndërkohë që aplikimi do të fillojë nga janari i vitit 2018.
Ola Mitre/SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.