Në farmaci mungojnë maskat – Koronavirusi, kërkesë e shtuar nga qytetarët, Manastirliu: Janë private
Nëpër farmacitë e kryeqytetit nuk ka maska mbrojtëse, ndërkohë që pas rasteve të konfirmuar me kornavirus në Itali ka një kërkesë të shtuar për blerjen e këtyre materialeve mjekësore. Ministrja Ogerta Manastirliu tha për TV SCAN se farmacitë janë private dhe është në dorën e tyre nëse do të furnizohen me maska apo jo.
Farmacistët pohojnë gjithashtu se ka një kërkesë të shtuar, jo vetëm për maska por edhe për dezinfektues. Ndërkohë që vetë qytetarët ankohen për mungesën e këtyre materialeve mjekësore, por edhe për çmimin e lartë me të cilin po shiten dezinfektuesit.
Për ministren e Shëndetësisë, Ogerta Manastirliu farmacitë janë private dhe është në dorën e tyre nëse do të furnizohen me maska apo jo. Pyetur nga TV SCAN për këtë çështje, Manastirliu tha se maskat duhet të përdoren vetëm nga persona që janë të sëmurë, gjithsesi sipas saj rrjeti spitalor i disponon.
Ndërkaq, mjeku pranë Shërbimit Infektiv në QSUT, Tritan Kalo shpjegon për TV SCAN se kur është i nevojshëm përdorimi i maskave mbrojtësve.
Ola Mitre / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.