Në kërkim të të pasurve – Italia vendos taksë të sheshtë, vetëm për të huajt

Italia do të përqafojë taksën e sheshtë për të pasurit  jo italianë. Taksa e sheshtë për miliarderët e huaj ka për synim që të sjellë në vend sa më shumë kapital të huaj, duke  e bërë vendin tërheqës për të huajt, por edhe duke ndjekur shembullin e vendeve të tjera.

Pak ditë më parë, një raport tregonte se, Italia ka humbur shumë milionerë gjatë viteve të fundit, ndërkohë që në Londër numri i tyre është rritur me thuajse 30% në harkun e një dekade.

Nëpërmjet taksës së re të sheshtë, të pasurit jo italianë, që aktualisht paguajnë taksa në vende të tjera, prej të paktën 9 vitesh, do të duhet të paguajnë vetëm 100 mijë euro.

Kësaj shume i shtohen edhe 25 mijë euro për kokë në rast se në deklarimin e  pasurisë shtohen anëtarë të tjerë të familjes. Ligji tashmë ka hyrë në fuqi.

Taksa e re lehtësuese nuk prek as italianët e as ata që gjatë viteve të kaluara janë larguar nga vendi për shkak të taksës progresive. Nëpërmjet lehtësirave fiskale, Italia kërkon të tërheqë sheikë, futbollistë, apo artistë.

Duke qenë se Italia ka çka të ofrojë, veç lehtësirave fiskale, autoritetet presin që ligji i ri të jetë i suksesshëm.

Roel Korkuti/SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.