Në Kosovë skeptikë për idenë e tregut të përbashkët ballkanik
Kosova duket se është kundër një bashkimi doganor të vendeve të Ballkanit Perëndimor. Ekspertët politikë e ekonomikë në vend janë shumë skeptikë, pasi sipas tyre një treg i përbashkët nuk i leverdis Kosovës.
Kjo ide e sugjeruar nga kryeministri serb Vuçiç është mbështetur nga kryeministri shqiptar Rama dhe kryeministri i Bosnje-Hercegovinës, madje ka qenë tema kryesore e takimit të fundit në kuadër të procesit të Berlinit.
“Bëhet fjalë për influencë të Serbisë në ekonomitë rajonale dhe natyrisht, Kosova nuk ka një interes të tillë që të ketë një ndikim të Serbisë në këtë rajon, gjithmonë për t’u ushqyer pretendimet e Serbisë për status neutral ndaj integrimeve evropiane dhe ndaj influencës ruse në rajon”, është shprehur Lumir Abdixhiku, drejtor i Institutit “Riinvest” në një intervistë për Radion Evropa e Lirë.
Ai vazhdon më tej duke kërkuar nga Shqipëria të tërhiqet nga kjo nismë.
“Do të ishte mirë që Kosova të fliste edhe me Shqipërinë që t’i bindte ata për mosdhënie të përkrahjes, sepse përkrahja fillestare e Shqipërisë është e pakuptimtë dhe e pashpjegueshme në këtë moment”, tha Abdixhiku.
Sipas tij, kjo do të nënkuptonte pikërisht çka Vuçiç është shprehur në një intervistë: Jugosllavi e re + Shqipëri.
Ndërkohë, zëra të tjerë në vend, si profesor Emrush Ujkani, thonë se Kosova nuk duhet t’u frikësohet ideve të tilla.
“Kosova vazhdon të ketë pengesa të ndryshme nga Serbia, duke i diskriminuar edhe mallrat, produktet që prodhohen në Kosovë. Pastaj, Kosova dhe qytetarët e saj nuk kanë assesi mundësi të lëvizin lirshëm në Bosnje e Hercegovinë. Kosova është vendi i vetëm që nuk e ka mundësinë që qytetarët e saj të lëvizin lirshëm edhe në zonën Schengen. Mendoj që Kosova, mbi bazën e këtyre tri gjërave, duhet ta ngritë zërin dhe kur këto tri gjëra të sqarohen në njëfarë forme, atëherë, natyrisht që do të ishte e gatshme për ta mbështetur. Kosova nuk ka arsye t’i frikësohet, madje as ta ngritë flamurin për ta kundërshtuar diçka të tillë”, thotë profesor Ujkani.
SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.