Në lupë investimet në kriptomonedha mbi 1 milionë lekë – Ashpërsohet ligji për pastrimin e parave, mbikëqyrje e shtuar për transaksionet virtuale

Legjislacioni për riskun e pastrimit të parave po orientohet gjithnjë e më shumë nga investimet në kriptomonedha, të cilat shpesh janë vështirësisht të gjurmueshme e kanë shtuar mundësitë për fshehjen apo kamuflimin e transaksioneve financiare. Një seri ndryshimesh po shqyrtohen në Kuvend lidhur me rrezikun e pastrimit të parave, të cilat parashikojnë zgjerim të gamës së subjekteve që do konsiderohen me risk të lartë, por duke u orientuar nga paraja virtual.

Një projektligj i sapo depozituar në Kuvend përcakton një kufi prej 1 milionë lekësh, afërisht 10 mijë dollarë, për të ndezur dritën e kuqe të rrezikut të pastrimit të parave. Në kuptim të kësaj pike, ligji konsideron me risk të lartë ndërmjetësit e investimeve në kriptomonedha që kryejnë transaksione për llogari të një personi tjetër fizik apo juridik, që lëviz mjetin virtual mbi këtë vlerë nga adresa e mjetit virtual ose llogaria e një personi tjetër.

“Ofrues i shërbimeve të mjeteve virtuale” nënkupton çdo person fizik ose juridik, i cili kryen, për ose në emër të një personi tjetër fizik ose juridik, një ose më shumë nga këto aktivitete: i) shkëmbimi ndërmjet mjeteve virtuale dhe monedhave të njohura zyrtarisht; ii) shkëmbimi ndërmjet mjeteve virtuale dhe pasurive të çdo lloji; iii) shkëmbimi ndërmjet një ose më shumë formave të mjeteve virtuale; iv) transferimi i mjeteve virtuale; v) ruajtja dhe/ose administrimi i mjeteve virtuale ose instrumenteve që mundësojnë kontroll mbi mjetet virtuale; vi) pjesëmarrja dhe sigurimi i shërbimeve financiare lidhur me ofertën e një emetuesi dhe/ose shitjen e një mjeti virtual.

Lorenc Rabeta / SCAN

*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.