“Në mars të hapen negociatat”, 9 shtete anëtare kundërshtojnë Francën për procesin e zgjerimit
Debati për procesin e zgjerimit të Bashkimit Europian është kthyer tashmë në një tematikë mjaft të nxehtë ndërmjet shteteve anëtare. Pas propozimeve të Francës që erdhën në formën e 7 fazave, një tjetër dokument jozyrtar po qarkullon në media i përpiluar nga 9 shtete anëtare ku përfshihen: Austria, Republika Çeke, Estonia, Italia, Letonia, Lituani, Malta, Polanda dhe Sllovenia i titulluar “Elementët për përshpejtimin e procesit të zgjerimit dhe integrimin e qëndrueshëm të Ballkanit Perëndimor”.
“Reforma e procesit të zgjerimit bëhet mbi vendimin e hapjes së negociatave me Maqedoninë e Veriut dhe Shqipërinë, i cili duhet të merret në mars të 2020-ës”, nënvizohet në hyrje të draftit.
Sipas dokumentit, kapitujt e negociatave duhet të grupohen në bashkësi kryesore, për shembull përgjatë tetë nën-komiteteve të Marrëveshjes së Stabilizim-Asociimit përmes hapjes dhe mbylljes së tyre të përbashkët.
Diferenca kryesore e këtij dokumenti nga propozimet e Francës, e cila nënvizonte 7 faza të procesit të zgjerimit, është fakti se grupimet e kapitujve duhet të bëhen në mënyrë paralele dhe jo sipas radhës.
Iniciativat e reja politike, sipas dokumentit, përfshijnë takimet vjetore të Këshillit të Europës me liderët e Ballkanit Perëndimor, rritja e përfaqësimit të Ballkanit Perëndimor në mbledhje të këshillit, si edhe komisione të përbashkëta me Komisionet dhe Komitetet e Këshillit Europian.
Dokumenti gjithashtu propozon të krijohen “Konferencat e Evropës” në të gjithë rajonin për të promovuar dialogun dhe konsultimin. Parlamenti Evropian, parlamentet kombëtare dhe shoqëria civile do të përfshihen të gjitha në këto iniciativa, ku do të informohen qytetarët mbi Unionin.
Propozimet e mëtejshme përfshijnë strukturë më të mirë për kapitujt 23 dhe 24 mbi sundimin e ligjit. Dokumenti propozon që duhet të ketë më shumë përparësi dhe rekomandime të qarta, përfshirë afatet, dhe që BE duhet të ofrojë më shumë mbështetje në luftën kundër krimit të organizuar dhe korrupsionit.
“Të gjithë instrumentet tashmë të disponueshëm të procesit të pranimit, përfshirë klauzolën e çekuilibrit, duhet të hulumtohen më tej për të forcuar avantazhin e BE-së”, thuhet në dokument.
Komisioni duhet të prezantojë implementimin e direktivave të BE në secilën fushë në mënyrë që të lehtësojë një konsensus më të gjerë për vlerësimin e reformave p.sh. përmes një tabelë rezultati, veçanërisht në fushën e sundimit të ligjit, thuhet në dokument.
Sa i përket stimujve financiarë, dokumenti jozyrtar thekson se ato duhet të jenë efektive dhe të synuara. Pjesëmarrja graduale në Tregun e vetëm të BE-së dhe hapja e më shumë programeve të BE-së për Ballkanin Perëndimor gjithashtu duhet të konsiderohet.
Anëtarësimi i plotë i rajoneve në BE mbetet qëllimi përfundimtar i procesit, dhe dyert e BE-së mbesin të hapura, thekson dokumenti jozyrtar.
Geri Kolgega / SCAN
*Material i përgatitur nga portali SCAN. Ripublikimi mund të bëhet vetëm kundrejt citimit të autorësisë dhe burimit origjinal.